Shillong, Ïaiong 07: Ka Ïingkashari Meghalaya High Court hynne ka sngi palei, kala bthah ïa ka Sorkar Jylla ban wan rah ïa ki lad ki lynti kumno ban khanglad noh ïa ka jingpynjaboh ïa ki Wah bad ban pynkhuid pat ïa ki kumba long ha ka mynnor.
Haba shongbishar ïa ka Public Interest Litigation (PIL), ka Ïingkashari bala khlieh da u Chief Justice Sanjib Banerjee kala ong ba bun ki Wah khamtam kito kiba ïaid lyngba ka Nongbah Shillong lane kiba ïaid na ki sorbah kum ka Nongstoiñ ki dei kiba la donkam ban hap pynkhuid noh.
“Ka um ka dei ban tuid kumba ka long ha ka mynnor kat kum ki jingai jingmut na ki stad saiañ. Ka long kaba don kam ban pynlong ïa ki awareness campaign ban lah pynlong ïa kine ki wah kiba lah ban pyndonkam bad ruh ban khang noh ïa kino ki jait kam kiba ktah ïa ka wah” ong ka Ïingkashari.
“Donkam ban shim noh ïa ki lad ki lynti ban pynneh pynsah, iada bad pynkhie im biang ïa ki jingthung bad ki mrad ba im ha kine ki wah. Dei ban shim noh ïa ki sienjam ba shipor bad ba shirta bad ban pyntreikam thikna ïa ki” kala ong.
Ka Kashari kala bthah ruh ïa ka Jylla ban pynmih ïa ki kyndon halor kane, kaba nyngkong ka long ban tehlakam noh ïa ka jingpynjaboh ïa ki wah, hadien ka jingpynneh pynsah bad khatduh ban pynkhuid ne pynkhie im biang ïa ki.
Haba kyrshan ïa ka jingai jingmut jong u Amicus Curiae, ka Kashari ka ong ba ha ki jaka jngoh kai pyrthei ba khring bha bha, dei ban buh ïa ki sign board kaba batai ïa kaei kaba dei ban leh bad kaei ka bym dei ban leh nalor ban buh ruh ïa ki trai shnong ki ban pynthikna ïa ka jingkohnguh ïa ki kyndon bad ban buh ruh ïa ki helpline lada don kino kino ki jingujor.
“Kan bha shibun lada ki trai shnong ki iadon bynta lang ha kane ka sienjam namar kan pynlong ïa ki ban ieid ïa ka mariang bad ban iada ïa ka sawdong sawkun. Kala bthah ruh ïa ka Jylla ban mynjur ïa ki jingai sngewbha kum ka honorarium ne reward ïa ki briew kiba khmih ïa ka jingkhuid jong kine ki jaka”.
Namar ka jingnang bun ka jingwan rung ki nongshangkai pyrthei hapoh ka Jylla, ka kashari kala bthah ïa ka Jylla ban buh ïa ki jingthoh ‘Do’s’ and ‘Don’ts’ (ba shah bym bad shah), u pud ïa kaba ki nongshangkai kim lah ban ïaid palat, u pud ba kin leit shajan jong ki wah bad ruh ban pyrrkhing ïa ki ka jingbtret ïa ki katto katne ki mar kum ki plastic bad kiwei kiwei.
Ha kajuh ka por, ka Ïingkashari kala bthah ïa ka Sorkar Jylla ban shim ïa ka sienjam ha kaban khang noh ïa ka jaka bret niut ha Marten.
“Ïa ka mynta, dei ban shim noh ïa ki sienjam ba dei ban shim ha kaban khang noh ïa ka jaka bret niut ha marten, lada kala poi sha u pud ba ym don jaka shuh ban bret niut, haidne ba la dei ithuh ïa kawei pat ka jaka ban pynlong jaka theh niut” kala ong. Ka Kashari kala buh ban shong bishar biang ïa kane ka kam ha ka 3 tarik u Jylliew.
