Bthah ka Ïingkashari ban pynkylluid ïa ka Shillong District da ka phatok ba shipor.

Shillong, Ïaiong 21: Ka Ïingkashari Meghalaya High Court hynne ka sngi palei kala bthah ïa ka Sorkar Jylla ba kan shna ïa ka phatok bynrap ba shipor (Temporary Additional Facility) khnang ban lah weng ïa ka jingkhapngiah jong ka Shillong District Jail.
Haba shong bishar ïa ka PIL halor kane ka kam, ka Kashari ki arngut ki Nongbishar kala ong ba kaei kaba paw ka pyni ba ka Sorkar kala shim ïa ki sienjam ha kaban pynjanai ïa ka jinglong jingman jong ki phatok.
Hynrei, hapoh ka phatok ha Shillong, la i ba haduh 300% la pynshong ïa ki briew haba kdew ba donkam ban leh eiei noh mardor ïa kane.
“Ka Sorkar kala hap ban shim ïa ka sienjam ban pynthikna ba ka dei ban don kawei pat ka lynti ba hap ban leh mardor ha ka ban weng ïa ka jing khapngiah jong ka phatok ha Shillong. Ka sorkar ka lah ruh ban pyrkhat ïa ka phatok bynrap ba shipor” ong ka Ïingkashari.
La ka long kumno kumno ruh, ym lah satia ban pdiang ba kin don ki phatok ba pynsah haduh 300% ki briew.
Ïa mynta, ka Shillong District jail ka don haduh 464 ngut ki koidi bala set na ka jingngiam briew ba tang 175 ngut.
Kane ka phatok bala tei naduh u snem 1897, ka dei kaba set ïa ki koidi Under Trial Prisoners (UTP) na East Khasi Hills, West Khasi Hills bad South West Khasi Hills District.
La pyntip ruh sha ka Ïingkashari ba nalor ki san tylli ki phatok kiba don mynta ha Shillong, Tura, Williamnagar, Nongpoh bad Jowai, ka Sorkar ka dang pyntrei ruh mynta ïa ka phatok ha Nongstoiñ nalor ka Central Jail ka ban sa don hajan ka Nongbah Shillong.
Ka Ïingkashari kala buh ban shong bishar biang ïa kane ka mukotduma ha ka 6 tarik u Jylliew.