Bthah ka Ïingbishar ïa ki trai jaka ban pynbeit bad u DC ban pynheh ïa ka surok NH-51
Shillong Risaw 07: Ka Ïingbishar ka la pynkut noh ïa ka jingujor ha kaba ïadei bad ka jingpynheh ïa ka surok National Highway-51 na Goeragre sha Chitoktak bad Dobasipara sha Dalu kaba ha West Garo Hills. Ïa kane la ujor da ki 46 ngut ki trai jaka na ka liang ka Ïingbishar ka la bthah ïa ki ban thoh da ka application sha Deputy Commissioner ban shim khia ïa kine ki jingeh ha kaba ïadei bad ki kam jaka bad ka jingshim ïa ki jaka na ka bynta ban pynheh ïa ka surok.
“Kiba kyrpad halor kane ka kam kim lah ban shim khia ha kaba ïadei bad ka jingtuklar ha kaba ïadei bad ka jingshim jaka. Hynrei ha kaba ïadei bad kane kan long kaba la plie ïa ki nongkyrpad ban pynpaw ïa ki jingeh jong ki haba ïadei bad ka jingthew ïa ki jaka ki ban long katkum ki kyndon jong ka aiñ kaba hab hapoh ka Right to Fair Compensation and Transparency in Land Acquisition, Rehabilitation and Resettlement Act, 2013 da kaba phah ïa ki jingkyrpad kaba hab hapoh ka Section 64 jong kane ka Act,” ong u Justice B Bhattacharjee ha ka jingshim bishar. Na ka liang u nongbishar u la bthah ïa Deputy Commissioner ban peit ïa kine ki application kiba dei ban ïaid katkum ka aiñ.
Ki nongkyrpad ki la ïakhun ïa ka Notification No. RDA 103/2015/365 u bnai Jylliew ka 27 tarik, 2019, haba ïadei bad kiba bun ki kaiphod bad ka Declaration vide No. RDA 103/2015/744 ka 8 tarik u Jylliew, 2020 kaba la buh hapoh ka Section 11 (1), Section 15 bad Section 19 (1) jong ka Right to Fair Compensation and Transparency in Land Acquisition, Rehabilitation and Resettlement Act, 2013 ha kaba ïadei bad ka jingshim ïa ka jaka ha Chibragre, Ganolgre, Duragre, Chasingre, Meggonggre, Sangsanggre, Darengre, Dopgre, Jenggitchakgre, Bolchugre, Darak A-kong, Chekwatgre, Ronggatagre, Gimbil A-Dinggre, Rongbibanggre, Daluagre, Romba Chisakgre, Rongbretgre, Wakkolnanggre, Danabollonggre, Bolmapara, Amongpara, Kherapara Nokat, Kherapara Songma, Songmagre, Mandagre, Rengsipara, Rangdapara, Doldenggagre, Karonggre, Tibapara, and Magupara villages, West Garo Hills District, na ka bynta ban pynheh ia ka surok National Highway-51 na Goeragre sha Chitoktak bad Dobasipara sha Dalu.