Bthah ka ïingbishar HC ïa ka Sorkar ban thaw ïa ki kyndon ban tih dewïong da ka buit stad saïan

Shillong, Naiwieng 24 : Ka ïing bishar High Court (HC) jongka jylla ka la bthah ïa ka sorkar jylla ban thaw ïa ki ain ki kyndon na ka bynta ban tih mar poh khyndew da ka buit stad saïan kynthup ruh haduh kaba shalan ïa une u dewiong uba la tih da kane ka buit ba thymmai.
Ha ka kaiphod kaba Khatphra ba la aiti da u Justice (Retd) u Brojendra Prasad Katakey u la pynpaw “ La bthah ïaka sorkar jylla ba kan thaw ki ain ki kyndon ha kaba ïadei bad ka rukom tih dewiong da ka buit stad saïan kumjuh ruh ha kaba shalan ïa une u dewiong uba la tih da kane ka buit ba thymmai namar ka lah ban don bïang ka jingtih dewiong beain ha ka jylla ka ban ïaïaid ryngkat ruh bad ka jingtih dewiong ba la shah da ka sorkar jylla.Kumta ka donkam eh ïa ki lad ki lynti ban khang shisyndon ïa kane ka jingtih dewiong beain khnang ba kin ym ïoh lad ban shalan ïa u dewiong ba la tih beain bad u dewiong uba la aibor ban tih”.
U Justice Katakey uba la thung ban bud dien ïa kane ka kam tih dewiong beain ha ka jylla u la leit jurip ruh dang shen sha East Jaintïa Hills bad West Khasi Hills District ha ka 7 tarik mynta u bnai ha kaba la synrad lang ruh ïa u da u Director jong ka Mineral Resources, ki nongmihkhmat na ki bor synshar district bad ki bor pulit lem bad kiwei kiwei ki heh sorkar.
La pynpaw ba ym shym la lah pat ban poi sha ka jaka ba la pyrshang ban tih dewiong da ka buit stad saïan.
“ Ki nongpynïaid jongka kynhun ba la pyrshang ïa ka jingtih dewiong da ka buit stad saïan ki la pyntip lypa ba kane ka kam ka dang shu sdang bad dang shu sdang ruh tang ban ksam thliew shapoh kumta kat haduh ban da sdang pura ka jingtih dewiong da kata ka buit stad saïan kan dang shim por nadong shadong ban ïoh sdang haduh hynriew bnai ei ei”.
Kumta la bthah ïa u Director ka Mineral Resources uba leit jurip ïa katei ka jaka ba sdang tih dewiong da ka buit stad saïan ba un ai ïa ka kaiphod hapoh shiphew sngi bad ha kajuh ka por ba un pynbeit lano ka sngi ba u Justice Katakey un leit jurip sha katei ka jaka.
Ha ka kaiphod la bthah ruh ïa ka sorkar jylla ban set ne khang noh ïa palat 1000 tylli ki thliew tih dewiong. “ Ki don palat 1000 tylli ki thliew tih dewiong kiba la shu ieh kumto khlem btep bad khlem peit bad sumar kaba la shu lang da ka um acid bad tuid sha ki wah ba marjan bad pynjaboh ïa ki um ki wah, kumta la bthah ïa ka sorkar ba ka dei ban btep noh ïa kitei ki thliew da kaba pan jingïarap na ka CMPDI bad ïa kane ka sorkar ka dei ban shim khïa bad buh hakhmat eh.
Nalor kane la bthah ïa u Deputy Commissioner jongka East Jaintïa Hills District ban tohkit bad ai ïa ka kaiphod hapoh shitaiew halor ka jingïai bteng ka jingtih dewiong beain ha katei ka district.
Nalor kata la bthah ruh ïa u DC ba un tohkit halor ka jingshna ïa ka jaka thew (weighbridge) hynrei ka bym shym treikam pat tad haduh mynta bad halor kane u DC u dei ban ai ïa ka kaiphod.
Shuh shuh ka kaiphod ka pynpaw ba ha ka por ba leit jurip sha East Jaintïa Hills la lap ba ka la don ka jingpynhap ïa u dewiong ba dang shu dep tih haruh ka surok bah hajan Don Bosco College bad kumjuh ruh shadien kane ka College ha Byndihati.La lap ruh ïa ki krem tih dewiong kiba dang thymmai ha katei ka jingleit jurip. Kumta ka jingdon jong une u dewiong uba dang shu dep tih ka pynthikna ba ka jingtih dewiong beain ka dang ïai bteng beit. La lap ruh ïa ki dien shaka trok kiba thymmai sawdong katei ka jaka ba pynhap ïa u dewiong kaba pynthikna ba ka jingkhaii beain ïa u dewiong ka dang ïai bteng beit.