Bthah ka ïing Bishar ïa ki bor District ban pynkhlaiñ peitngor ban ïaid beit ka Yatra sha Mawjymbuiñ

Shillong, Nailur 1 : Ka ïingkashari High Court jongka jylla kala ong ba ki nongshah mudui ki lah ban ai ïa ki jingai jingmut sha ki bor pynïaid District ba kan shim ïa ki lad ki lynti ki ban pynthikna ba ka Yatra, kaba la buh ban long la 2 tarik Nailar, kan ïaid beit khlem kino kino ki jingjia. La bhtah ruh ïa kibor synshar district ba kin peitngor ban ïaid beit kane ka kam.
Ka ïing Bishar bala khlieh da u Justice HS Thangkhiew kala pynpaw ruh ba kam kwah satia ban pynmih ïa kano kano ka hukum kaba lah ban pyntroiñ noh ïa ka hukum ba kham hashuwa, bala pynmih da ka ïing bishar
“Naba ïa ka Yatra, la pyntip bala buh ha ka 2 tarik Nailar, 2025, kane ka ïing bishar kam kwah ban pynmih shuh shuh ïa ka hukum kaba lah ban pyntroiñ noh ïa ki hukum bala dep pynmih da ka ïing Bishar. Hynrei, lada ki nongshah mudui ki kwah na ka bynta ka jingshngaiñ, ba ka Yatra kan ïaid beit khlem kino kino ki jingjia, ki lah ban ai ïa ki jingai jingmut sha ki bor district ba kin pynneh ïa ka shongsuk shongsaiñ da kaba shim ia ki lad jingiada kiba donkam” ong ka ïing bishar ha ka hukum ba pynmih ha ka sngi Palei.
La pyntip ruh sha ka ïing bishar ba kala don ka jingpyrshah na ka Shnong ba kyrteng ka Lyngiong haba ïadei bad kane ka Yatra.
La bthah ïa u nongïasaid aiñ jong ki nongmudui ba un phah da ka jingthoh sha ka Deputy Commissioner, ka ban sa pynmih ïa ki hukum kiba donkam.
ïa kane ka kam la buh ban shong bishar biang ha ka 5 tarik Nailar, 2025.