Shillong, Nailur 29 : Ka ïing bishar High Court (HC) ka la bthah ïa ka Khasi Hills Autonomous District Council (KHADC) bad ïa ka State Pollution Control Board ba ki dei ban hiar jurip ïa ka wah Umiam ban ban bishar ruh ba kino kino ki kam ba leh da ki briew ba kim dei ban wanrah ka jingjakhlia ïa katei ka wah.
Kane ka hukum ka long hadien ba la shong bishar ïa ka mukotduma PIL ba la ujor pyrshah ïa ka jingsdang mih ki jingtei sawdong kane ka wah.
U nongujor ïa ka mukotduma u la pynpaw ba ki la bun ki jingtei kiba la mih harud kane ka wah kaba la wanrah ka jingjaboh bad jakhliah ïa kane ka wah kynthup ruh ïa ka Resort Orchid ba la pynïaid da ka MTDC. Ha kane ka jingbishar kiba shah ujor u bah Philosopher bad ka kong Banalari Khongwar ruh ki hap ban wan hajir hakhmat ka ïing bishar. Namar kine ki la ïoh ïa ka notice ba ki la tei beaiñ ïa ki resturant bad cafe hajan ka wah Umiam.
La bthah ïa ka kong Banalari bad u bah Philosopher ba kin ai affidavit bad suh lang ruh ïa ki kot ba donkam halor ka jingïoh jingbit jongki ban tei ïakine ki jingtei hapoh ka 12 tarik Risaw. La pyntip ruh ba ïa ka Ever Banalari la khang tala bad khlem pyndonkam shuh bad ka jingtei ïa ka Moon View Cafe ruh ym pat pyndep haduh mynta. Ka ïing bishar kan shong bishar biang ha ka 17 tarik u Risaw halor kane ka mukotduma.
