Shillong, Naitung, 01: Ka Ingbishar Meghalaya High Court ka la bthah ïa ka Sorkar Jylla ban pyntreikam noh da ki ropeway bad kiwei kiwei de ki lad halor ka kit ka bah khnang ban weng ïa ka jingdheng kali.
“Ka Sorkar Jylla ka lah ban shna ïa ka ropeway bad kiwei kiwei de ki lad ha kaba ïadei bad ka kit ka bah khnang katkum ka jingdonkam,” ong ka miej bishar jong ki arngut ki Nongbishar haba shong bishar ïa ka PIL ha ka sngi Thohdieng.
Ka Jylla la pyntip ba ka la ïakren bad ki riewshemphang kumno ban pynsuk ha ka leit ka wad bad ïoh ruh ïa ka kaiphod kaba sdang. Kane kan ïarap ban pyntreikam ïa ka bynta kaba tang shipor bad ban wad ïa ki lad ki lynti kumno ban pyntreikam kham slem.
U Advocate-General u la ong ba ka sorkar ka ladep khot tender ban pyntreikam noh da ki mini-buse khnang ban leit shaw bad leit on ïa ki khynnah skul khlem da pyndonkam shuh da ki kali shimet.
Ka Ingbishar ka la ong ruh ba ka la lap ba bun tylli ki bos kiba la pyndonkam ban kit ha ka leit ka wan jong ki paidbah ki la sniew bad la shu bret sha kyndong ha kiba bun ki jaka.
U Advocate General u la kular hakhmat ka Ingbishar ba ka sorkar kan sa wad ïa ki lad ki lynti ban die lilam noh ïa ki bos kiba la sniew katkum ki kyndon ain khnang ba ka pisa kaba duna yn sa lah ban pyntreikam ïa ki kali kit paidbah hapoh ka sor Shillong.
Ka Sorkar ka la phah ruh ïa ka jingtyrwa sha ka World Bank ban bei pisa na ka bynta 21 tylli ki Electric Bus ban kamai tang hapoh sor Shillong.
