Bthah ka HC ïa ka sorkar ban pynkhreh ïa ki kyndon ban shah tih dewiong ha ka jylla

Shillong, Nailur 26 : Ka ïing bishar High Court (HC)) jongka jylla ka la bthah ïa ka sorkar ban pynkhreh ïaki kyndon kiba biang na ka bynta ban shah noh ban tih dewiong biang ha ka jylla Meghalaya.
“ Dei ban pynkhreh ïa ki kyndon kiba biang da ka sorkar jylla ha ka jingsngewbit jongka na ka bynta ban shah noh ban tih dewiong kat kum ka aiï MMDR Act 1957 bad pynpoi kopi sha ka ïing bishar” ong ka hukum na ka ïing bishar ba la shong bishar da baroh ki Nongbishar hapoh ka jingpyniaid jong u Chief Justice Sanjib Banerjee mynta ka sngi.
Nalor kane ka ïing bishar HC ka la bthah ruh ïa ka sorkar ba kan pynkhreh ïa ka plan na ka bynta ban die lilam noh ïa u dewiong ba dang lum thup uba don sa 31.26 lak matric ton ha ki jaka bapher bapher hapoh ka jylla.
ïa kane ka plan ban lilam bad shalan noh ïa u dewiong dei ban aiti sha ka ïing bishar shwa ban shong bishar biang hadien lai taiew.
Ka hukum ka la ong ruh ba ka long ka sien ba nyngkong ba u Justice BP Katakey u la aiti ïa ka kaiphod kaba hynriew ha kaba u la pynpaw ïa ka jingsngew hun ba la bud ïaki kyndon jingbthah ka ïing bishar SC bad NGT da ki bor synshar bad kane kan ïarap mynta na ka bynta ban pynkhreh ban lilam bad shalan ïa utei u dewiong uba dang lum thup hapoh u snem ban wan.
Ka kaiphod na u Justice Katakey ka pynpaw ruh ba u Secretary jongka Mining and Geology bad ki nongmihkhmat na ka Coal India Limited ki la aiti ha u ïa ka jingpynkhreh kumno ban lilam noh ïa u dewiong bad ka jinglum jingkheiñ ïa u dewiong yn pyndep hapoh shi taiew bad hadien kane yn sa aiti ïa ka kaiphod sha u.
Na ka liang u Chief Secretary ka jylla ruh u la aiti sha u Justice Katakey ïaka kaiphod kaba pynpaw ba la pyntreikam lut ïa baroh ki jingbthah jong ki ïing bishar bad kane ka long kat kum ka kaiphod ha ka 19 tarik Nailur 2022 ba la ai sha ka ïing bishar.
Hadien ba la lum jingkheiñ malu mala da u Justice Katakey halor u dewiong na ka liang u Chief Secretary u la pynpaw ba ki bor sorkar ki la shim khia ban pyntreikam ïaki hukum jong ka ïing bishar bad kane ka pynpaw ba ka jingbthah jong ka ïing bishar ka la long kaba seisoh.
Kane ka kaiphod kaba hynriew ka kdew ruh ïa u dewiong ba 92,269.43 Matric Ton ba la tih beaiñ bad ïa une yn sa bishar kat kum ka MMDR Act 1957.
U dewiong baroh uba dang lum thup u don 31,26,025 MT bad ïa une yn sa lilam bad shalan ha ki san bynta (quarter).
Ka ïing bishar ka la bthah ruh ïa ka sorkar ban siew bai lut bai sep sha u Justice Katakey 2 lak tyngka. Ka jingshong bishar halor kane ka mukot duma kan long biang ha ka 18 tarik Risaw 2022.