Shillong, Jylliew 13 : Ka ïing bishar High Court jongka jylla ka la hukum ïa ka sorkar jylla bad ïa ka Shillong Municipal Board ban wanrah ïa ka jingkhuid jingsuba hapoh ka nongbah Shillong.
Haba pynwai ïa ka mukotduma PIL ba ujor na ka bynta ban wanrah ïa ka jingkhuid jingsuba ha sawdong kane ka nongbah Shillong ki arngut ki nongbishar ba kynthup ïa u Chief Justice Sanjib Banerjee bad u Justice W Diengdoh ki la pynpaw “ La kyrmen ba ka sorkar jylla bad ka Shillong Municipal Board (SMB) kin ïatrei lang ban pynthikna ban wanrah ïa ka jingkhuid jingsuba ha kane ka sor Shillong kumba long ki jaka hapoh ka jingpeit jongka Cantonment Board”.
Hooid ym lah ban len ka nongbah ka dang kham ikhuid hi, wat la ka don ka jingbret niut pathar bad kumjuh ruh ka jingpynhap maw bad shyiap pathar ha ki jaka ba tei ïing tei sem ne ba tei kino kino ki jingtei.
La pyntip sha ka ïing bishar ba ka sorkar bad ka SMB ki la thaw ïaki kyndon da kaba ïatrei lang ruh bad ka Cantonment Board. La ïathuh ba la pynlong ïa ki prokram pynsngewthuh bad ai jinghikai ïaki paidbah, na ka liang ka ïingbishar ka la ong “ ïa kine ki jinghikai bad pynsngewthuh ïa ki paidbah dei ban leh ha ka rukom ka ban khring ïaki paidbah, ban leit pynsngewthuh sha ki skul khamtam lei lei sha ki skul sorkar ha kaba kiba bun ki khynnah skul ki dei na ki long ïing longsem kiba duk”.
Nalor kata ka donkam ban wanrah jingkhuid bad jingïada ïa ki wah kum ka wah Umkhrah, ki kshaid kiba don ha ka nongbah bad sawdong jongka. Dei ban khang ïa ka jingpyndonkam ïaki plastic,ïa ki bilor, ïa ki plastic song jingbam ha kitei ki jaka bad khang ruh ban wanrah sha kitei ki jaka. Na ka liang ka ïing bishar ka bthah ïa ki bor ba dei peit ba kim dei ban kheiñ sting halor kane namar u nongujor u lah ban ujor biang ruh lada jia ba ym don ka jingshim khia.
