Bthah ka HC ïa ka jylla ban peitngor ïa ki jingtei kiba lah ban ktah ïa ka wah Umïam

Shillong, Nailar 11: Ka Meghalaya High Court ha ka sngi Palei ka la bthah ïa ka jylla ba kan peitngor ïa baroh ki jingtei kiba lah ban ktah ïa ka wah Umïam.
Ha ka hukum kaba ïadei bad ka PIL ba ïadei bad katei ka phang, ka kynhun nongbishar (full bench) ka la ong ba kumba ka paw ba ka la don ka jingpeitngor ban pynkhuid ïa ka Barapani bad ruh ban weng ïa ki jaboh jabaiñ kiba per ha ka um, nalor kiba bun ki jingtei ba thymmai kiba don ha sawdong katei ka pung.
“Kyrmen ba baroh ki jingtei kiba lah ban ktah ïa ka um ha wah Umïam dei ban peitngor bad pyntikna ba ka jingtei dei ban peit khnang ba kin long katkum ki kyndon jong ka ain da kaba buh hakhmat shwa ïa ki kyndon ïada mariang,” ong ka Bench.
La bthah ruh ïa ka jylla ba kan phah ïa ka kaiphod haba ïadei bad ki jingtei kiba dang ïaid sawdong ka wah Umïam kynthup ïa ka cafe kaba la dep bad kiwei kiwei ki projek kiba dang khreh kiba ka jingai jingbit kiba la dep pan ne ba la ïoh ruh.
Katei ka Bench ka la ong ruh halor ka khuid ka suba jong ka pung, la kyrmen ba ka sienjam ba la shim kin ïai bteng na ka por sha ka por bad naduh ki trai shnong haduh ki nongwan kai kin tip da kaba buh ïa ki jingkdew bad jingthoh ban pyntikna ba kan ym don ka jingbret pathar ïa ki jaboh jabaiñ shapoh um.
“Ïa ki briew kiban pahara, dei ban ailad da kiba na kito hi ki jaka da kaba siew ha ka dur kum ka jingai sngewbha,” ong ka Iing Bishar da kaba bthah ruh ïa ka jylla ban phah da jubab haba ïadei bad katei ka phang hapoh ki lai taïew.
Ka sien shong bishar kaban wan kan long ha ka 12tarik Nailar.