Bthah ka DGP ïa ka tnad CID ban tohkit halor ka surok Shillong-Nongstoin-Rongjeng -Tura

Shillong, Naiwieng 10 : Ka Director General of Police (DGP) jong ka jylla I Kong Ida Nongrang I la hukum ïa ka tnad CID ban tohkit halor ka jingkynnoh bamsap ha ka jingshna ïa ka surok Shillong- Nongstoin-Rongjeng-Tura ha ka jingpynlut ba 2366.77 klur tyngka.
ïa kane ka hukum ka DGP ka la pynmih ha ka 23 tarik Risaw ba ïa ki case Shillong Sadar P.S Case No 268 (09) 2024 U/S61(2)/316(5) 317 (4)/ 332(2)(3)/340(2)/344 BNS dei ban aiti noh sha ka CID ban bteng ïa ka jingtohkit bniah halor kane ka jingkynnoh bamsap.
ïa u Pulit Ophisar uba tohkit ïa kane ka jingmudui la bthah ban aiti noh ïa baroh ki kot ki sla sha ka tnad CID.
Shuh shuh ka tyllong khubor ka ïathuh ruh namar ba bun palat ki jnit ki jnat kiba hap ban leh khamtam ba ka dei ka kam shna surok kumta la donkam ban thung da ka kynhun tohkit ba kyrpang ban don lut ki nongtohkit naduh ki heh pulit, ki barikor bad kiwei kiwei.
Na ka liang ka sorkar lyngba u Chief Engineer (NH) PWD (Roads) ha ka 10 tarik Nailur 2024 ula ujor da ka ejahar ha Shillong Sadar Police Station pyrshah ïa ki ar tylli ki kompani kiba pyntrei ïa kane ka surok bad kumjuh ruh ïa u Chief Engineer ba rim bad u Executive Engineer ba rim kiba don ha ka por ba pyntrei ïa kane ka surok.