Nongstoiñ, Ïaiong 01: Ka Smt. Hema Nayak, IAS Deputy Commissioner West Khasi Hills District, ka la pyntip sha ki paidbah ba ka Sorkar India ka la pynmih ïa ki jingbthah ha kaba ïadei bad ka jingtem bad jingrwai ïa ka jingrwai Ri India ‘Vande Mataram’, khnang ba baroh kin sngewthuh ïa ka jingmut bad ka jingkhia thew jong kane ka jingrwai bad kumno ban burom ïa ka ha man la ki por ba rwai ïa kane ka jingrwai. Ka jingrwai ba thikna jong ka Jingrwai Ri ka don ka jingjrong kaba la antad kumba 3 minit bad 10 sekhon.
Ïa ka Jingrwai Ri yn pynsawa ha ka por ba pynkup burom ka Sorkar ïa ki briew, ha ka jingwan bad jingleit jong u/ka President ha ki jingïalang ba pura jong ka Jylla bad kiwei kiwei ki jingïalang ba la pynlong da ka Sorkar. Shwa bad hadien ba u/ka President ki kren lyngba ka All India Radio bad ka telebishon. Halor ka jingwan bad jingleit jong u Lat/Lieutenant ka Jylla ha ki sngi lehkmen jong ka Jylla, hapoh la Jylla ne Union Territory. Haba rah ïa ka Lama ka Ri India ha ka parade.
Lah ruh ban tem ïa ka ha kano kano ka por kumba la bthah da ka Sorkar India. Haba la tem da ka kynhun tem, ïa ka Jingrwai Ri yn sdang shuwa da ka jingsawa jong ki tyndong, hynñiew sien jam ha ka jingïaid parade kaba suki, kaba nang kiew bad nang hiar ha ka jingsawa, bad hadien kata sangeh shipor shwa ban sdang ïa ka jingrwai.
Ha kano kano ka por ba pynsawa ne rwai ïa ka Jingrwai Ri, ki nongsngap kin ieng ban sngap. Hynrei haba ka long shi bynta jong ka khubor ne ka jingthoh, ym khmih lynti ba ki nongpeit kin ieng, namar ka lah ban pynthut ïa ka jingpyni.
Haba la rwai ïa ka Jingrwai Ri bad ka Jingrwai Anthem ka Ri, dei ban tem ne rwai nyngkong ïa ka Jingrwai Ri.
Ka jingrwai Paidbah ïa ka Jingrwai Ri ka dei ban long ha ka por ba pynher ïa ka Lama Ri ha ki sngi kyrpang. Ha ki jingïalang Sorkar ne ki jingïalang paidbah ha ka jingwan jong u/ka President bad shuwa ba u/ka President kin leit noh.
Kum kine ki jingpynbeit ki lah ban kynthup ïa ka kynhun nongrwai kaba pura ryngkat ki tiar put tiar tem ne ka kynhun tem bad ban ïarwai lang ïa kajuh ka jingrwai ha kajuh ka sur, ban sam ruh ïa ki sur jingrwai kiba la shon haba donkam. Ha man la ki por, yn rwai ïa ka sur ba la pynbna da kaba ïashim bynta lang da ki paidbah.
Lah ruh ban rwai ïa ka Jingrwai Ri ha ki por ba kongsan wat la kim dei ki sngi kyrpang ruh, khamtam ha ka jingdon jong ki riew pawkhmat, tangba dei ban leh ïa ka da ka jingburom bad ka akor kaba biang.
Wat la ym lah ban jer kyrteng lut ïa baroh ki por kyrpang, hynrei ym don jingkhang ban rwai ïa ka Jingrwai Ri ryngkat bad ka jingïarwai paidbah, tangba dei ban leh ïa kane da ka jingburom, ka akor bad ka jinglong kaba ryntih, kum ka dak jong ka jingai burom ïa ka ri.
La kyntu ïa ki skul ban sdang ïa ka sngi da ka jingrwai paidbah ïa ka Jingrwai Ri. Ki bor synshar skul ki dei ruh ban pynsngewthuh bad pynrung ha ki khynnah skul ba kidei rwai ïa ka, Ka Jingrwai Ri, Ka Jingrwai Anthem ka Ri bad ban burom ïa Ka Lama Ka Ri India.
