Shillong, Jymmang 23: Ka Deputy Commissioner ka South West Garo Hills, ka Hema Nayak, IAS, ha ka jingsynran lang u Digonto Hajong, Block Development Officer ka Zikzak C&RD Block, ki la leit ban jurip ïa ki jaka kiba don ha kylleng ka Mahendraganj bad ki thaiñ ba marjan ban khmih ïa ki jingïaid ki kam ha ka koit ka khiah, ka pule puthi bad kiwei ki projek jingtei.
Kine ki jingleit jngoh ka pyni ïa ka jingangnud jong ka bor pynïaid distrik ban pyntreikam ïa ki skhim ka sorkar bad kumjuh ruh ban pynbha bad kyntiew ïa ka jingim jong baroh ki nongshong shnong bad ban banjur ruh ban pynbha ïa ki jingai jingshakri, ki kam pynroi ba kynthup ïa ki jingtei na ka bynta ka bha ka miat jong ki nongshong shnong ka South West Garo Hills.
Ka Deputy Commisioner Hema Nayak ka la jurip ruh ïa ka Mahendraganj Community Health Centre (CHC), kynthup ruh ïa ki tnat, ki kamra USG, bad ki transit room. Ka la pynlong ïa ki jingïasyllok bad Dr. Noor Ain Khan, Senior M & HO In-Charge, ha kaba ïadei bad ki jingpyntreikam ïa ki prokram ka koit ka khiah ka sorkar ba kynthup ïa ka Non-Communicable Diseases (NCD) bad ka Megha Health Insurance Scheme (MHIS).
Ka Nayak ka la pynpaw ruh ka jingsngewhun halor ki kam ba la jop da ka CHC ba kynthup ka jingbym don ki longkmie ba khlad, ka jingïap ki khyllung bad ka jingkha ki khyllung ba la don hapoh ka kaiphod ha kine ki 4 bnai ba la leit.
Ka Deputy Commissioner ka la bishar kam ruh halor ka jingïaid ki kam ka Science and Commerce College ha Mahendraganj. Ka la banjur halor ka jingdonkam ban pynneh ïa ki kam jingtei kiba bha bad ban pyndep ïa ka project ha ka por ba la buh khnang ba ka snem pule kan ïoh ban sdang ha u nailur 2025.
Kum ka Chairperson ka District Water and Sanitation Mission (DWSM), ka DC ka la leit ruh ban jurip ïa ka Silkona Combined Water Supply Scheme, ba la synran da BDO, Executive Engineer (PHE) Ampati Division, SDO (PHE) Ampati Sub-Division, ki Junior Engineer, bad u kontraktor ka projek.
La ïathuh ba kane ka skhim la khmih lynta ba kan jingmyntoi ïa kumba 11 tylli ki shnong, kiba don 1,880 tylli ki longïing. Kumba 10 tylli ki shnong ki la dep ïoh ïa ka jingsam ïa ka um bad ka jingpynïaid ïa ki pipe ka dang ïaid ha kiwei pat ki shnong. Ka kam baroh ka la poi kumba 92% naba ka kam sam bording la pynsangeh shipor ïa ka jingpump um.
Ka DC ka la bthah ïa ki bor ba dei khmih ban pynbeit ïa kane ka kam sam bording kham kloi bad ban pynthikna ban pyndep ïa ka project ha ka por.
Kane ka jingleit jngoh ka la kut da ka jingleit jurip ïa ka Kasturba Gandhi Balika Vidyalaya (KGBV) kaba ha Zikzak, ha kaba ka Deputy Commissioner ka la ïasyllok bad ki khynnah pule, ki nonghikai bad ban bishar ruh ïa ki kam jingtei bad jingtreikam hapoh kane ka skul.
