Bthah ka Committee u Justice Katakey ia u CS ban pynthikna ban sangeh mardor ka tih dewiong ha East Jainttia Hills

Shillong, Nohprah 04 : Ka Committee ba ïalam da u Nongbishar ba la shongthait u Justice BP Katakey kala bthah ïa u Chief Secretary ka Jylla ba un pynmih ïa ka hukum ban pynthikna ïa ka jingpynsangeh mardor ïa ka jingtih dewiong beaiñ ha East Jaintia Hills District.
Nalor kane, ka Committee kala bthah ruh ïa u Deputy Commissioner bad Superintendent of Police ka EJH ba kin ithuh ïa ki jaka kiba lah ban don ka jingtih beaiñ bad ban pynkhlaiñ ïa ka jingïaid pahara ban pynsaneh ïa ka jingtih dewiong beaiñ.
Kane kala mih hadien ka jingujor bala ïoh pdiang dang shen na u MLA ka VPP na Mawlai Bah Brightstarwell Marbaniang pyrshah ïa ka jingïai bteng ki kam tih dewiong beaiñ ha ka shnong Lumbangla.
Ha ka Interim report ba 34 bala aiti sha ka ïing Bishar High Court jongka jylla, ka Justice BP Katakey Committee kala pynrem ïa ki bor pynïaid district bad pulit ka EJH namar ka jingbym lah ban tehlakam ïa ka jingtih dewiong beaiñ ha ka shnong Lumbangla, wat hapdeng ka jingkhang tih dewiong ka NGT ha u snem 2014 bad ka hukum ka Supreme Court ha u 2019.
Ka Committee kala bthah ïa u DC bad SP ka District ba kin pynkhlaiñ ïa ka jingïaid pahara bad ban ithuh ïa ki jaka ba lah ban don ka jingtih dewiong haba bynrap ba ïa kine ki kam dei ban khmih hi da u DC bad u SP, ki ba hap ban aiti ïa ka kaiphod ba bniah manla u bnai halor ki sienjam ba kila shim ban pynsangeh ïa ka jingtih dewiong beaiñ bad ruh ïa kiei ki kam ba kila leh kat kum ka aiñ, haba ki shem ïa ki jingtih dewiong beaiñ, sha u Chief Secretary lane u Ophisar ba ula thung, u bym dei ban long hapoh ka kyrdan Additional Chief Secretary.
“U Chief Secretary/Additional Chief Secretary kin hap ban pynmih ïa ki jingbthah ba donkam na ka por sha ka por, ban pynthikna ïa ka jingpynsangeh ïa ka jingtih dewiong beaiñ ha EJH District” bynrap u Katakey.
Ka Katakey Committee kala pynpaw ruh ïa ki jingduna ha ka jingregister ia ki ejahar ba ïadei bad ka jingtih dewiong beaiñ ha shnong Lumbangla.
Ka Committee ka la buh ïa ki jingkylli kumno ki pulit kim lap bad kem ïa kane ka jingtih dewiong beaiñ namar kat kum ka jinglap jongka Committee kane ka jingtih dewiong beaiñ ka ïai bteng beit namar la lap ba la pynskhem ïa ka krem tihdewiong da ki paia dewbilat bad don ruh u dewiong ba la lum thup uba don 2112 MT. Kane ka pynpaw ïa ka jingtlot bad jingbym shim khia ki bor synshar district bad ki pulit kiba la pheil ban pynsangeh ïa kane ka kam beaiñ wat hadien ba la pynmih hukum da ka NGT ha u 2014 bad da ka ïing bishar ba hakhlieh duh ka ri ka Supreme Court ha u 2019 ban pynsangeh mardor ïa kane ka jingtih dewiong beaiñ.