Shillong, Nailar 08: Ka Assembly’s Committee on Women Empowerment jong ka Ïing Dorbar Thaw Aiñ ka jylla ha ka sngi Nyngkong ka la ai jingbthah ïa ka tnad labour ban thaw ïa ki kyndon ban ïada ïa ka hok ki nongtrei nongbylla kiba im ja na ka ka kam bylla ha ki unorganized sectors ha ka jylla baroh kawei.
Haba kren sha ki lad pathai khubor hadien ba la wai ka jingïalang bad ka tnad Labour ka Chairperson jong ka Committee ka Kong Ampareen Lyngdoh ka ïathuh ba na ka liang ka komiti ka la ai por ïa ka tnad Labour shibnai ban lum jingkheiñ ïa ka jingdon jong ki nongtrei nongbylla ha ka jylla baroh kawei kiba ka lad ka mai jong ki da kane ka jait kam.
“Ngi la bthah ïa ka labour commissioner ba kan wad ki lad ki lynti la kumno kumno hapoh shibnai kumno ban leh ban ïada ïa ka hok ki nongtrei nongbylla kiba kamai na kaba trei kum ki nongbylla ïing briew, ki nongtrei kynta bad kiwei de ki jait kam” ka la ong
“Ha ka jingïatai ngi ïoh jingtip ruh ba kito kiba trei ha kine ki jaitkam kim ju ïoh shuti wat lada ki armet bad ki kha khunlung bad lad” ka la bynrap
Ka komiti ka la pan jingshai ruh la ki ningtrei nongbylla ki ïoh ïa hok jong ki ban ïoh shuti shisien shitaiew bad kiwei dei ki kyndon kiba ki ïa mynjur bad ki nongaikam jong ki ïathuh ka kong Ampareen.
“Ngi kwah ruh ban pynthikna ba kine ki nongtrei ki dei ban ïoh ïa ka bainong kat kum ka kyndon jong ka Minimum Wage Act jong ka sorkar na bynta kito kiba trei ha kine ki jaitkam” ka la bynrap shuh shuh.
Ka Kong Ampareen ka la ïathuh ba ka komiti kan ïaleh katba lah ban pynïoh ïa ka hok ki nongtrei nongbylla bad ka la ïathuh ba kan sa shong jingïalang biang ha u bnai Nailur na bynta kane ka kam.
