Shillong, Jylliew 21 : U Nongïalam ka Liang Pyrshah uba dei ruh u nongïalam ka All India Trinamool Congress (AITC) hapoh ka jylla bad Myntri Rangbah ba mynshwa jongka jylla u Dr Mukul Sangma u dang bteng mynta ka sngi ruh ban leit jurip ïa ki jaka ba la shah kttah bad shah pynjulor na ka jingshlei um ha South Garo Hills (SGH) District.
Ha kane ka jingleit jurip la synran lang ïa u da ki MLA bad MDC jongka AITC na ri lum Garo lem bad kiwei kiwei ki riew pawkhmat.
Kane ka jingther u lapbah ym tang ba ka ktah ïa kane ka thaiñ Khasi bad Jaintia hynrei ka ktah jur ruh ïaka ri lum Garo ha kaba bun ki surok, ki jingkieng ki la shah pynjulor bad shah rong, kumjuh ruh bun ki ïing kiba la ngam shapoh ka um. Ki la don haduh 8 ngut ki briew kiba la duh ei ia ka jingim ha ri lum Garo. Da ki hajar ki long ïing ki la kylla phet wir na la ki ïing ki sem bad sah ha ki ïing sherdara. “Na kane ka jingjur slap bad shlei um kiba bun ki surok ki la dkut bad bun ki jingkieng ki la shah rong bad kiba bun ki jaka ha ki district bapher bapher ki la sahkut namar ym lait shuh ban ïaid ki kali. Kumta ki paidbah ki la mad ïa ki jingeh namar ki la sdang ban kyrduh bam.
Kumta na ka liang ka AITC kumba ka ïeng ban shakri ïaki paidbah ka la pyrshang ruh katba lah ban leit ïarap bad pynpoi ïa ki marbam sha kito ki jaka ba shah ktah jur” ong u Dr Mukul.
Bun ki jaka ha Siju, Rongara, Maheshkola and Khalu ki la sahkut khlem lait shuh ka leit ka wan namar ka jingshah rong ki jingkieng bad shah klong ki surok ha ka um.
Dei na kane ka daw baka sorkar mynta ka sngi ryngkat bad ka jingïatrei lang bad ki shipai suiñ ki la leit ban pynhiar ïa ki mar bam ha Maheshkola ha ka por janmiet da ki helikopter.
U Dr Mukul u la ong ba ka sorkar ka dang donkam ban leh bun kiei kiei ha kum kine ki por ba shah lyngshop ki paidbah ha ki bor mariang namar ki la shah pynjulor ki jingthung jingtep, ki jaka rep jaka riang bad ka sorkar ka dei ban phai bad ai jingïarap ïa ki nongrep ruh.
