Shillong, Risaw 10: U Myntri Rangbah ka jylla u Conrad K Sangma, ha ka sngi Palei u la leit jngoh ïa ka shnong Purakhasia bad ki jaka ba marjan ban khmih ïa ki jingeh jong ki ba ki la mad ha ka jingjia shlei um kaba dangshen.
Ha kane ka jingleit jngoh jong u, u la lum ruh ka jingïalang khmih bniah bad ki ophisar jong ka district bad kumjuh ruh jong ki ophisar jong ka block ha Purakhasia Block Office kaba ha Puran Bazaar.
Na ka liang u Myntri Rangbah u la ïasyllok ruh bad ki nongshong shnong bad ban pynthikna ïa kiba ka sorkar kan leh ïa ka bynta kaba kongsan tam ban ïarap ha kiba bun ki liang khamtam ki jingïarap na ki bor pynïaid district bad kumjuh ruh na ka liang ka sorkar. Na ka liang u Myntri Rangbah u la ong ruh ba watla ki la don bun ki jingshah pynjulor kum ki pung dohkha, ki jaka thung jaka tep bad ki dieng ki seij na ka liang ka tnat Agriculture bad Horticulture bad kiwei ki tnat kin trei borbah ban pynbiang ïa ki lad ai jingïarap ha kum kane ka por.
U Myntri rangbah ha kane ka sngi u la leit ruh ban jurip ïa ki tyllong um kiba don hajan ka wah kaba ha Purakhasia.
U la leit ruh ban jurip ïa ka jingkieng kaba pynïasoh ïa ka Wagigitok sha Akimpara lyngba ka wah Grim.
Ha ki shnong Aikinpara bad Posenggagre u Myntri Rangbah u la pynlong ïa ka jingïalang paidbah ban sngap ïa ki jingeh jong ki nongshong shnong bad ban pynthikna ïa ki lad jingïarap na ka sorkar bad na ki heh ophisar.
Na ka liang jong u, u la leit ruh ban jurip ïa ka jingkieng kaba ha Thallang ha ka shnong Angalangre bad u la jurip ruh ïa ka jingkieng kaba la julor ha Rimrangpara kaba don halor ka wah Norang.
