Nongpoh, K’Lyngkot 20: Kum ka jinghikai ïaki paidbah ban bud ïaki kyndon aiñ ñiah kali khamtam ki kali ar shaka ban phong ïaki helmet kum ka jingïada na kano kano ka jingjia ba sngewsih, ki pulit ka Nongpoh Traffic mynta ka sngi kila bteng ban talasi naphang ïaki thuk thuk ar shaka ki bym burom ïaki kyndon aiñ ban phong helmet.
Kum ban shu pynpaw hangne, ki pulit jong ka Ri-Bhoi lyngba ka Nongpoh Traffic Police hynnin ka sngi kila pynlong ka jingtalasi ïaki thuk shuk bad ban sam ruh da ki helmet sha ki paidbah kum ka jinghikai ba ki dei ban phong beit haba mih sha surok ban lait na kano kano ka jingjia ba sngewsih bad ka jingmynsaw, hynrei bun naki paidbah kim kheiñ snep bad burom ïaki kyndon.
Naka liang ki bor pulit kila hikai ruh ïaki paidbah ba ym dei tang u ba ñiah ba dei ban phong helmet hynrei wat kiba shong hadien naduh ki khynnah, ban shngaiñ ka leit ka wan bad khamtam ban lait naka jingjia ba sngewsih, bad kumjuh ruh ki kali rit ba deng ïaki seat belt haka por ba ñiah kali.
