Nongpoh, Naitung 27: Wat hadien bun ki jingtalasi bad ki jingmaham jong ki bor pulit ka Ri-Bhoi khamtam ki ar sha ka ban burom ïa ki aiñ ñiah kali ban lait na kano kano ka jingjia ba sngewsih, ban phong ïa ki helmet bad ruh ban nym pynlong jaka lehkai ha surok bah National Highway, ki pulit ka Nongpoh Traffic ki khlem shongthaid ban hikai bad ai jingsneng ïa ki paidbah ha kaba mynta ka sngi u Blei ki la pynlong ka jingtalasi biang ïa ki ar sha ka ha ka thaiñ Nongpoh.
Kaba sngew lyngngoh ka long ba bun na ki paidbah kim pat sngewthuh shai bad kim patiaw ïa ka jingmaham bad ka jingtrei shitom jong ki pulit ban hikai ïa ki paidbah na ka bynta ka jingshngaiñ jong ki bad kumjuh ruh kiwei ha ka leit ka wan, ha kaba bun na ki paidbah ki la shah bat ha ka thaiñ Nongpoh bad shah daiñ kuna ruh kumjuh.
Na ka liang ka tnad pulit ka la kyrpad sha ki paidbah ba ki dei ban burom ïa ki aiñ ñiah kali bad kim don jingmap satia ïa ki nongpynkheiñ aiñ naduh ki ar sha ka na ka bynta ka jingshngaiñ jong ki nongleit nongwan ha surok bad ban lait na ki jingjia ba sngewsih.
