Bteng ki jingpanmab tang mar ïa sei pyrthei halor jingïap u Raja Raghuvanshi, ïaroh u DyCM
Shillong, Jylliew 11 : U Symbud Myntri Rangbah ka Jylla, Bah Prestone Tynsong ha ka sngi Balang u la ong ba ka jinglah ban sei pyrthei lut ïa ki jingjïa baroh kiba ïadei bad ka jingshah pynïap jong u Raja Raghuvanshi u nongjngohkai pyrthei na Indore ba shah pynïap ha Sohra dang shen, ka la pynlong ïa kito kiba kynthoh bad pynjah burom ïa ka Meghalaya ba kin sngewthuh ïa ka jingbakla bad mih ruh ban panmab.
“Nga sngew ban ai ka jingïaroh ïa ka jingsngewthuh jong ki ïa ka jingkitkhlieh la ka long ïa ki National Media lane ïa ki riew shimet kiba la pynpaw lyngba ki social media. Nga ngeit ruh lyngba ka jinglap ha ka sngi Nyngkong ba la dep da ka jingtrei shitom jong ki pulit jongngi, nga tip ba ka pyrthei baroh kawei ka la tip mynta ïa ka jingshisha bad ba kito ki briew kiba kynthoh pyrshah ïa ka jylla jongngi ki la sngewthuh ïa ka jingkren bakla jong ki,” ong u Bah Prestone haba kren bad ki lad pathai khubor.
Ha kawei pat ka liang, u Bah Prestone u la ong ruh ba u ïaroh ïa ka sienjam ba ki lad pathai khubor bad ki riewshimet ki shim haba iadei ban pynshai biang pat ïa kaei kaba ki la dep ban kynthoh mynshwa.
Da kaba kyntu ïa ki paidbah ba kin wan jngoh ïa ka jingitynnad ka mei mariang ha Meghalaya, u Symbud Myntri Rangbah u la ong ba na ka liang ka sorkar jylla bad ki paidbah ka thain ki kwah ban pyntikna ba kin don ha ka jingshngain bad kin ïoh ruh ban leh kmen bad hun jrut kampher la ki wan kum ki nongwan honeymoon lane kum ki nongwan kai. “Nga nud ban kular ba ki briew jongngi kin ai ka jingshakri kaba paka tam eh lada phi wan sha kane ka jylla,” u la ong.
Lah ban kdew hangne ba u hynmen jong u Raja Raghuvanshi bad kumjuh ki ar tylli ki lad pathai khubor kiba heh ha ka Ri ba kynthup ia ka Times of India bad kumjuh ka Republic TV ki la pynmih ïa ka jingpanmap jong ki halor ka jingkynthoh kaba ki pyllait. Kane ka jingmih jong ki ban panmap kadei hadien ba ki pulit ka jylla ki la lah ban buddien bad thwet halor ka jingshah pyniap u Raja Raghuvanshi ïa kaba la suba ba ka kurim jong u, ka Sonam ka la don bynta lang ha kane ka kam ba sngewshyrkhei.