Shillong, Ïaïong 04: Ka Nongthymmai SC kala bteng khur nam jop ha ka lympung ïalehkai First Division Football League ba pynïaid da ka Shillong Sports Association (SSA). Ka Nongthymmai SC kala pynliem noh da 1-0 pyrshah ïa ka Nongrim Hills SC ha ka jingïakhun ha ka sngi Nyngkong ha madan MFA, Polo, Shillong.
Ka jingïakhun hapdeng kine ki ar tylli ki team ka long kaba mar ïakhaid bad ïabiang bor bha, baroh ar tylli kila pynlehnohei ïa shibun ki kabu thep kol naduh kaba sdang ha kaba ka jingïalehkai kala kut noh khlem da don ba lah ban ïathep kol ha kaba kut jong ka kylla step.
Haba wanphai sha ka kylla miet, tang hadien katto katne minit bala ïaid ka jingïalehkai u Humble Syiem u la thep ïa ka shi kol (47min0 kaba la ai mynsiem ïa ka kynhun bad ha ka minit ba 61 u Mat Makri u la thep ïa ka kol kaba ar kaba la neh haduh kaba kut jong ka jingïalehkai.
Lyngba kane ka nam jop ka Nongthymmai ka la kamai 6 point na ki arsien ïakhun katba ka Nongrim Hills SC ka kamai lai point na ki arsien ïakhun. Ka jingïalehkai mynta ka sngi (05-03-2022) kan long hapdeng ka Imson SC bad Sawmer S ha ka por 3:30 baje janmiet.
