Shillong, Naitung 10 : Ka Mawlai SC ka la bteng ban khur jingjop ha ka lympung ïalehkai OC Blue Shillong Premier League 2021-22 hadien ba ka la pynliem da 4-0 ïa ka Ryntih SC ha ka jingïalehkai ha ka sngi Saitjaiñ ha madan Third Ground, Polo, Shillong.
Lyngba kane ka nam jop ka Mawlai SC ka la bat biang ïa ka kyrdan ba nyngkong ha ka miej kheiñ point da kaba khur 12 point.
Haba phai sha ka jingïakhun hapdeng kine ki ar tylli ki team, ka Mawlai ha ka jingïalehkai ba dang ïaid 10 minit ka la ïoh ban thep shi kol lyngba u Donlad Diengdoh, shwa ba u Samuel Lyngdoh Kynshi un thep ïa ka kol kaba ar ha ka minit ba 27.
Ka Mawlai SC ka la bteng ban ïakhun tyngeh khlem da ailad ïa ka Ryntih ban thep kol ha kaba ka la ïoh ban lamkhmat da 2-0 ha kaba kut jong ka kylla step.
Haba wanphai sha ka jingïakhun jong ka kylla miet hadien ka jingïashong jahthait, ki rangïalehkai ka Ryntih ki la ïakhun tyngeh ban pynphai hynrei bun ki kabu ki la pynlehnoh ei noh kaba pynlong ïa ki rangïalehkai ka Mawlai ban nang ïoh mynsiem.
Ka Mawlai ka la nang ïakhun tyngeh bad pashat bol ha ka rukom kaba itynnad bha bad ka la ïoh ban pynsmiej bun tylli ki jingpyrshang thep kol bad da ka jingïai ïakhun khlem kynran dien, u Remark Kharmalki u la ïoh ban pynkhih jar ha ka minit ba 58 kaba la nang pynskhem shuh shuh ïa ka Mawlai sha ban khur jingjop.
Watla ka la thep lai kol pynban ka Mawlai SC ka khlem ailad bad ban nang pynskhem shuh shuh ïa ka nam jop, u Samuel Lyngdoh Kynshi ha ka minit ba 74 sa shisien u la thep ïa ka kol kaba ar bad ba saw na bynta ka Mawlai SC.
Watla ka Ryntih ka la pyrshang ïakhun tyngeh hynrei ka khlem lah pat ban pyndep ha ka liang ka thep kol. Ka jingïalehkai mynta ka sngi Nyngkong kan long hapdeng ka Shillong Lajong FC pyrshah ïa ka Mawkhar SC ha ka por 4 baje janmiet.
