Nongpoh, Jylliew 15: Ban bteng ïa ka jingpynshai paidbah halor ka thong jong ka Pradhan Mantri TB Mukth Bharat Abhiyan (PMTBMBA) na ka bynta ban rad dyngkhong ïa ka jingpang TB hapoh ka District bad ka jylla hi baroh kawei, ka ophis ka District Tuberculosis officer, Ri Bhoi mynta ka sngi ka la pynlong ïa ka prokram ai jinghikai shaphang ka jingpang TB ba la pynlong ha RNB Carbide & Ferro Alloy Limited, Umiam.
Kane ka jingpynlong ïa kane ka prokram ka long beit thik ban ai jinghikai kyrpang sha ki paidbah nongshong shnong ban tip halor ka thong ka sorkar kmie ban rad dyngkhong ïa ka jingpang TB, kaba dei kawei na ka jingpang kaba ktah bad kaba bit sha kiwei lada kito kiba shah ktah kim bud ïa ki kyndon ba la buh da ka sorkar ban dih dawai.
Ha kane ka prorkam la wan ban shim bynta lang da ki nongshong shnong, ki samla pule ka St. Joseph University, Bangalore, bad kumjuh ruh ki nongmihkhmat na kiwei kiwei ki Karkhana kiba don ha Umiam.
Kiwei kiwei ki nongmihkhmat na ka liang ka sorkar lyngba ka tnad ka koit ka khiah kiba la wan ban ai jinghikai ki kynthurp ruh naduh ka Dr. E. Kalwing, District Tuberculosis Officer ka Ri Bhoi, Dr. W. Chyne, MOTC Umsning TU; Dr. M. Diengdoh, Block Medical Officer ka Umsning Block. U Bah R. Marbaning, DPC Jhpiego, ka Kong N. Tracy Kharkamni, State Coordinator ACSM, State TB Office bad kiwei kiwei de.
Ka Dr. E. Kalwing kum ka District TB Officer ka Ri Bhoi, haba ai jinghikai ha kane ka sngi ka la kham ban khia halor ki dang ki shin bad ki jingktah jong ka jingpang TB ha ka imlang ka sahlang. Ka la ai ruh ka jingbatai halor ki dak ki shin jong ka jingpang TB ba dei ban shim khia ban ioh ïa ka jingïada kum ka jingjyrhoh ba palat ar taiew, ka khieshohrieh, ka jinghiar ka jingkhia, ka jingbym bang ban bam jingbam bad ka jingktah ha kaba ring ne pynhiar mynsiem.
Ka la pynshlur ruh ïa kito kiba don jingpang TB ba kim dei ban don kano ka jingtieng jingsmiej haba ki lap ïa kitei ki dak ki shin bad kum ki nongshong shnong kiba don ka jingkitkhlieh ki dei ban wan sha ki Doctor khnang ban ioh ban eksamin na ka bynta ban ai dawai bad kum ki paidbah ruh ki dei ban sngewthuh ba ka jingpang TB kam dei kaba ym lah ban pynkoit ha kaba lah ban pynkoit lada ki kloi ban wan sha ki lada jingsumar.
Haba pynpaw halor ka thong jong ka jylla bad ka sorkar kmie ban pynduhjaid ïa ka jingpang TB ba la buh thung naduh u snem 2025 hapoh ka ri hi baroh kawei, u Dr. W. Chyne, Medical Officer ka Umsning Tuberculosis Unit, u la ai ka jingbatai halor ka thong jogn ka sorkar lyngba ka Pradhan Mantri TB Mukth Bharat Abhiyan (PMTBMBA). U la buh ruh ka jingkyrpad ïa ki riew kylluit mynsiem ban ai ka jingkyrshan na ka bynta ban ïarap ïa kito kiba pang TB lyngba ka jingpynbiang ïa ki bam ki dih kiba tei met katba ki dang don ha ka jingsumar khnang ba kane ka thong jong ka sorkar ban pynduhjaid ïa ka jingpang TB kan long kaba jop.
Shuh shuh, lyngba jong kane ka sngi, u Bah Risbunlang Marbaniang, Programme Coordinator ka Jhpiego, u la pynshai halor ka jingdonkam ban ai kyrteng jong kito kiba don mon ban kyrshan ïa kiba pang TB na ka bynta ban pynbiang ïa ki jingbam ba tei met bad kito kiba don ka mon ban ïa trei ryngkat ne ban kyrshan ban pynduhjaid ïa ka jingpang TB ki lah ruh ban wad jingtip lyngba ka IKSHAY web portal (https://reports.nikshay.in/FormIO/DonorRegistration) lane ban wad jingtip na kino kino ki jaka ai jignsumar kiba don hapoh ka District.
