Bteng ka NorthEast United FC ban bat ïa ka nam lahduh ha ka Durand Cup
Synshar hi marwei baroh lai tylli ki khusnam shimet jong ki rangïalehkai ba kynsai mynta u snem
KOLKATA, Nailar 23: Ka NorthEast United FC ka la bteng ban bat ïa ka nam lahduh jong ka Durand Cup hadien ka jingjop kaba shyrkhei da kaba pynliem jem ïa ka Diamond Harbor FC haduh 6-1 kol ha ka phainal kaba 134 jong kane ka lympung ha Vivekananda Yuba Bharati Krirangan ha Kolkata ha ka sngi Saitjaiñ.
Da kane ka jingjop ka NorthEast United FC ka la kylla long ka kynhun kaba 12 ha ka histori jong ka Durand Cup ban rah ïa ka nam lahduh ar sien lynter, kumjuh ruh kaba nyngkong kaba la seisoh ban ïada ïa ka nam lahduh naduh ka por ba ka East Bengal ka la rah lai sien lynter (1989, 1990, 1991).
Ka NorthEast ka la sdang ïa ka Durand Cup 2025 kum ka kynhun kaba hap ban ïada ïa ka burom lahduh hadien ba ka la jop ïa kane ka lympung ha u snem 2024, da kaba pynliem ïa ka Mohun Bagan Super Giant ha ka final lyngba ka penalty.
Kane ka jingjop ka la pynïasoh lang ïa ka NEUFC ha ka thup ki kynhun ba pawnam kiba la lah ban jop ar sien lynter ïa ki nam lahduh ha ka histori jong kane ka lympung kaba rim tam ha dewbah Asia bad kaba lai ha ka pyrthei.
Ka NEUFC ka la tehlakam ïa ka jingïalehkai naduh ka kylla step, da kaba thep ar tylli ki kol lyngba u Asheer Akhtar (30’) bad u Parthib Gogoi (45’+1).
Hadien ba jam sha ka kylla miet, ka NorthEast ka la nang pynklaiñ ïa ka jingïalehkai jong ka ban tur shakhmat. U Thoi Singh (50’) u la pynkhih ïa ka kol kaba lai shuwa ba ki ar ngut ki rangïalehkai kiba na Spain, u Jairo Samperio (81’) bad u Andy Rodriguez (85’) kin ïasoh lang ha ka thup thep kol da kaba pynkhih ïa kaba saw bad kaba san. Hadien nangta, u rangïalehkai ba bun kol tam jong kane ka lympung, u Alaaeddine Ajaraie u la pynkut ïa ka jingïalehkai da kaba thep ïa ka penalty ha ki minit pynjlan shuwa ban wai (90’+3) ban pynthikna ïa ka jingjop ka ban sah jingkynmaw ha ka histori jong ka klob.
Ka shi kol jong ka Diamond Harbour ka la wan ha ka minit kaba 68 lyngba u Luka Majcen.
Nalor ba rah ïa ka nam lahduh, ka NorthEast United ka la jop ruh ïa ki khusnam shimet jong ki rangïalehkai ha kaba u Gurmeet Singh u la ïoh ban khur ïa ka Golden Glove ha ka sien kaba ar, katba ka Ajaraie ka la ïoh ban khur ïa ka Golden Ball kum u nongïalehkai ba kynsai tam bad kumjuh ruh ïa ka Golden Boot kum u nongïalehkai ba kham bun kol.