Shillong, Nailur 03 : Ka kynhun ïalehkai na Meghalaya ïa kaba la mihkhmat da ka Myngken Christian Higher Secondary School, Ri-Bhoi District ka la bteng ïa ka nam jop jong ka ha ka lympung ïalehkai jong ka Subroto Cup U-17 hadien ba ka la lah ban pynliem noh ïa ka Chandigarh da 1-0 kol ha ka jingïakhun kaba mar ïa biang bor bha hynne ka janmiet ha nongbah Delhi.
Ïa kane ka kol jong ka Meghalaya la ïoh ban thep da u Banganson ha ka minit kaba 16 jong ka kylla step.
Ka jingïakhun kaba bud mynta ïa ka Meghalaya ka long pat pyrshah ïa ka Bihar ha kane ka sngi Balang ka 04tarik Nailur ha ka por 4:30 baje janmiet.
Lah ban kdew hangne ba ka Meghalaya ha ka jingïakhun sdang kaba long ha kane ka sngi Nyngkong ka la ïoh ban thep haduh 23 kol ïa ka Dadra & Nagar Havelli kaba kylla long ruh kawei na ki kynhun kaba ïoh ban thep bun kol eh ha ka jingïakhun sdang jong kane ka lympung ïalehkai mynta ka samoi.
