Shillong, Naitung 27 : Ka Langsning ka la ïoh ban pynliem haduh 3-1 kol ïa ka Mawkhar Sports Club ha ka jingïakhun ba khatduh jong ka kylla kaba nyngkong jong ka Shillong Premier League kaba long hynne ka sngi Ba-ar ha madan Third Ground Polo.
Da katei ka jingjop, ka Langsning ka don mynta da ki 14 point katba ka Mawkhar pat ka don mynta ha trai duh jong ka miej ïa khein point da ki 2 point.
Kumba long mynta ka Langsning ka la beh nadien nadien mynta ïa ka Mawlai Sports Club kaba don mynta da ki 19 point bad bat ruh ïa ka kyrdan ba nyngkong ha ka miej khein point.
Ïa ki kol jong ka Langsning ha kane ka sngi la ïoh ban thep da u Figo Syndai ha ka minit kaba 24 jong ka kylla step, nangta u Shano Tariang ha ka minit kaba 46 bad u Kitboklang Pale ha ka minit kaba 79. Ïa ka shi kol jong ka Mawkhar pat la ïoh ban thep da u Lyngketlut Myrchiang ha ka minit kaba 47.
Shwa jong ka jingïakhun, ka Langsning ka la don ha ka kyrdan kaba ar da ki 11 point katba ka Mawkhar pat ka don ha ka kyrdan kaba ha trai duh da ki 2 point. Tangba ka jingjop jong ka Langsning hynne ka sngi ruh ka pynlong ïa ka Langsning ban neh ha kajuh ka kyrdan.
