Shillong, Risaw 28: Ka Laitkor SC ka la ïoh ban khur ïa ka jingjop kaba ar sien lynter ha ka lympung phutbol OC Blue Shillong Premier League 2024 ha kaba ka la pynliem noh da 2-0 kol ïa ka Sawmer SC hakhmat ki spah ngut ki nongkyrshan ba shitrhem ha madan First Ground-SSA Stadium, Polo, ha ka Lah Sngi U Blei.
U Risuk Malngiang (32’) bad u Fridison Wanniang (90’+3) ki la ïoh ban pynkhihjar kaba la ïarap ïa ka Laitkor ban khur biang ïa ka namjop, bad kumba ka long mynta, ka kynhun ka la jam ha ka kyrdan ba lai ha ka miej kheiñ poiñ jong ka SPL, kaba dei ka samoi ba nyngkong ïa ka Laitkor.
Baroh arliang mamla ki la ïoh ïa ki kabu ksiar ban pynkhihjar ha ki 10 minit ba nyngkong jong ka kylla step hynrei ka la shimpor shiteng kynta ïa ka Laitkor ban pyndkut ïa ka jingïakhaid. Kane ka la urlong hadien ka handball hapoh phyllaw kol kaba la pynïoh penalty na bynta ka Laitkor, ba la shimti da u Risuk. U rangapkol ka Sawmer – u Pyrshangbanbha Dkhar u la ïada ïa katei ka penalty hynrei phewse ka bol ka la wanphai biang sha u Risuk, bad khlem jingbakla u la lah ban thep ïa ka kol.
Lah ban kdew ba ka Laitkor ka la ïoh kham bun ki kabu ksiar ha ka kylla miet, hynrei ka la shimpor tad haduh ki minit pynjlan ïa ka kynhun ban pynkhih ïa ka kol kaba ar lyngba u Fridison, u ba la khyrwit da kaba tyngeh ïa ka bol khlem da ailad ïa u rangapkol ka liang pyrshah ban ïada.
Kumta, da kane ka namjop ka Laitkor ka la ïoh khur 6 poiñ ban ïa ryngkat bad ka Shillong Lajong FC (kyrdan ba nyngkong) bad ka Mawlai SC (kyrdan ba ar). Hynrei kine ki kynhun, ki don ka jingïapher kol kaba kham bun bad ka jingïalehkai ban sa ïakhun.
Ha kane ka sngi Hatmajai, yn sakhi ïa ka Langsning FC ka ban aireng pyrshah ïa ka Nangkiew Irat ha ka por 5 shiteng nohphaisngi.
