Shillong, Jylliew, 11: Ka jingther jong u lapbah ka lyiur ha ka sngi U Blei ka la wanrah ïa ka jingshlei um ha ki katto katne ki bynta jong ki ing ki sem ha ka thaiñ Langkyrding bad ha ka thaiñ Polo bad nalor kata la sakhi ruh ba ka jingsahkut jong ki plastik bad ki jaboh jabaiñ ha ki nala ka la pynlong ïa ka um ban tap wat ïa ka surok ïaid kali ha ka thaiñ Polo.
Kane ka jingshlei um ka la pynsyrtok ïa ki katto katne ki longing ha kitei ki ar tylli ki shnong ha kaba la sakhi ba ka um ka la shlei haduh ki phyllaw ing bad rung ruh wat sha ki ingsah jong ki briew na ka daw ka jingbym biang jong ki nala ban pyntuid ïa ka um sha ki nala heh kiba pynïasoh bad ka wah umkhrah.
Ha ki bynta jong ka Forest Colony, Polo katto katne ki longing kiba don marpyrshah bad ka Buddist Temple ki la shah ktah na kane ka jingshlei um kaba la long shaba palat liam mynta u snem na ka daw ka jingdon jong ki païa dewbilat ba la shna hapdeng jong ka nala heh kaba pyntuid ïa ka um sha wah Umkhrah.
Ha ka thain Laban, la sakhi ba kawei ka jaka ba la jia ka jingtwa khyndew ha u snem 2022 ïa kaba mynta la shna kum ka jaka pynieng kali, ka la pynshong syier bha ïa ki longing kiba la shna ha syndah jong nala heh namarba ka lah ban don ka jingtwa khyndew ha kano kano ka por ka bym poi pyrkhat.
Ka jingther jong u lapbah lapsan ha ka por mynstep ka la wanrah ruh ïa ka jingshlei um ha ki ing sah jong ki briew ha ka dong Lumsohkynphor, ka shnong kaba dang hap hapoh ka Dorbar Shnong Golflink.
La sakhi ba kane ka jingïoh rung jong ka um sha ki ing ki sem jong ki briew ka la pynsyrtok haduh katta katta ïa ki paidbah ha ka shong ka sah bad ha ka thiah ka dem.
