Kharkutta, Nailur, 23: Kum shi bynta ban pynkhlaiñ shuh shuh ïa ki kam pynroi ha ki thain khap sor, u Myntri Rangbah ka jylla u Conrad K Sangma, u la sam ïa ka jingai jingiarap sha ki nongrep, ki kynhun nongpynïaid ïew ïa ki mar, bad sha ki samla ha Kharkutta, North Garo Hills.
U Myntri Rangbah ka jylla u la sam jingïarap pisa kumba 19.10 Lak tyngka sha ki 30 tylli ki kynhun nongpynïaid ïew ïa ki mar ne ki Producer Groups jong ka North Garo Hills District kiba don bynta ha ka ban ri sniang, ban rep jingrep kum ia u sying ka kait. Bad u la ai ruh 12.25 Lak tyngka sha ki 1225 tylli ki longiing nongrep kiba hap hapoh ka skim ‘FOCUS+’ Farmer’s Welfare Programme. Ka jingsdang jong ka ‘FOCUS+’ ka long ban pynioh nong ïa ki trai jaka trai muluk lyngba kane ka skim. Ka ai lad ruh ïa ki long ïing nongrep ban im kham bha. Na ka ne ka skim la lah ban ïarap kumba 5,000 tyngka shi longing da kaba phah beit ïa ka pisa sha ki bank jong ki nongrep.
Shuh shuh, lyngba kane ka skim Rural Backyard Piggery, ‘PROGRESS’, 2000 tylli ki khun sniang (ba kynthup ia 3 tylli ki sniang kynthei bad 1 u sniang shynrang) la sam sha ki 500 tylli ki longïng nongrep ki ba hap hapoh ki 3 tylli ki block jong ka North Garo Hills District. Ka skim ‘PROGRESS’ ka don ïa ka thong ban kham pynbha ia ka rukom im ki nongrep lyngba ki kam ri jingri lait na ka thung ka tep. Lyngba ka ne ka skim la buh thong ban pynioh nong ia kumba 10,000 tylli ki longing nongrep kiba ba duk bad ruh ban pynbun ka jingkhaïi doh sniang ha ka jylla.
Kumban kheiñ kyllum la sam ruh 4.8 Lak sha ki 11 tylli ki seng samla kiba hap hapoh ka ‘YESS’ Meghalaya Youth Empowerment Programme. Ka YESS ka dei ka skim ban pynshlur ia ki samla ban pynkiew ha baroh ki liang bad khamtam ruh ha ka sports.
Haba kren ha kane ka sngi, u Myntri Rangbah u la ong ba ka jingbha jingmiat jong ki nongrep bad ki briew kiba shong ba sah ha ki thain khapsor ka dei ka thong ka ba ha khmat eh jong ka ne ka sorkar jylla. Kane ka long namar ba ki nongrep ka jylla ki dei ban iohlad ban kheit ia u soh ka jingkiew ha ka jylla. Ha kine ki saw snem shiteng, ka sorkar jylla ka la iarap bad pyni lad pyni lynti ruh ia ki nongrep ban sdang la ki jong ki kam bad ban seng kam ruh ia ki wei pat ha ki thain khapsor.
Kane ka la pyni ia ka jingkiew stet ha ka rukom im ki nongrep ha ka jylla. Hynrei dei ban sngewthuh ba ym dei ban shu hun tang katne, hynreidei ban nang trei shitom met bad mynsiem ban gin poi shisha sha kata ka thong.”
