Bteng ka jingot kba ki nongrep ha Lapangap, buh thong ban ïoh ot lut hapoh ar taïew

Jowai, Risaw, 23: Ki nongrep jong ka shnong Lapangap West Jaiñtia Hills District ki la bteng ban leit ot ïa u kba uba la ih hapdeng ka jingïaid beit ïaid ryntih ryngkat ka jingsynran lang ki paidbah na kiwei ki shnong, ki Magistrate bad ki Pulit kiba pahara na baroh ar liang.
U Waheh Shnong ka Lapangap u Bah Deimonmi Lyngdoh ula ong la kumno kumno ka jingpyndep ban ot lut ïa u kba na ki pynthor kiba don shajan ka khappud Lapangap-Tahpat kan long hapoh ar taïew eiei. U la pynpaw ka jingkyrmen kaba skhem ba kane ka jingïasngewthuh jingmut ki Pnar bad ki Karbi kan long kaba ïaidbeit.
Kum u Waheh Shnong u la ai khublei ïa baroh kiba wanrah jingsuk hapoh ki jaka khappud, khamtam eh ïa ki bor synshar ka sorkar Meghalaya bad Assam kiba la trei shitom met bad mynsiem.
U la ai khublei kyrpang ïa u Border Magistrate ka West Jaiñtia Hills u Bah G.H. Passah uba la don lang bad ka shnong haduh ban da sah miet ha ka shnong Lapangap, ïa u BDO ka Namdong bad kumjuh ruh ïa ki pulit kiba la don hapoh ka shnong.
U la pynpaw ruh ka jingsngewnguh bad ai khublei ïa ka Synjuk ki Waheh Shnong Ri-Lum Jaiñtia, ïa u Bah Erwin K Sutnga, ïa ka Joint Action Committee, ïa ka Elaka Shilliang Myntang hapoh ka jingïalam u Dolloi, ki nongïalam shnong, ki sengbhalang bapher bapher bad kiwei de ki kynhun treimon sngewbha.
U Waheh Shnong ula ai khublei ruh ïa u MP ka Shillong Dr. Ricky AJ Syngkon uba la hiar hi dalade ban ïohi da la ki jong ki khmat ïa ka jingeh jong ki nongrep bad kumjuh ïa ki nongshong shnong ka Lapangap.
Kum u Waheh Shnong u Bah Deimonmi u la pynpaw ïa ka jingangnud ba ka jingsuk kan wan phai biang hapdeng ki Khasi Pnar bad ki Karbi namarba ka jingïakynad bad ka jinghuri hura kam poi shaei shaei.