Bteng ka DLSA-EJHD ïa ka jingïalap paidbah ha SPS Lumshnong halor ka jingma na ka shongkha khynnah

Khliehriat Rymphang 12: Ka District Legal Services Authority (DLSA), East Jaiñtia Hills District mynta ka sngi ka la pynlong ïa ka prokram Follow-up Awareness Camp ha Star Public School, Lumshnong bad kane ka long ka jingbteng ïa ka prokram jingpynshai paidbah kaba 100 sngi kaba tip kum ka Intensive Awareness Campaign for a Child-Marriage Free Bharat kaba hapoh ka NALSA/ASHA SOP bad ka Bal Vivah Mukt Bharat Campaign kaba ïadei bad ka jingialap paidbah halor ki jingma kiba mih na ka shongkha khynnah.
Ha kane ka prokram ka Chief Legal Aid Defence Counsel, ka kong R. Manar bad ka Deputy Chief Legal Aid Defence Counsel, ka kong P. Paswett, ki la ai ki jingpynshai kiba iadei bad ki aiñ ki kyndon bad jingmana kiba katkum ka aiñ ha kaba ïadei bad ka Child Marriage Act, ki la batai ba kumno ka shongkha khynnah ka ktah ïa ka pule puthi, ïa ka koit ka khiah, ka ktah ïa ka lawei jong ki khynnah khamtam ki khynnah kynthei, ki la kyntu ba dei ban don lang ka jingkitkhlieh na ka imlang ka sahlang ruh ban lait na ka shongkha khynnah, ki la kyntu ruh ïa ki nongshong shnong ba kin sngewha ban pyntip lada don ka shongkha khynnah ha shnong ha thaw da kaba ki lah ban phone ha u Child Helpline Number 1098 bad Toll-Free Number 15100, ki la pynshlur ïa ki khynnah skul ba ki dei ban long kiba khlaiñ ha ka jingmut jingpyrkhat bad ruh ban pynphriang ïa kane ka khubor jingpynshai sha kiwei ruh ba ka shongkha khynnah ka buh jingma bad ka jingpynsaphriang ïa ka jingpynshai ka dei kawei ka jingnoh syniang sha ki shnong ki thaw kaba lah ban pynlong ïa ka imlang sahlang kaba lait na ka shongkha khynnah.
Ha kaane ka follow-up camp la pynlong ruh ïa ka jingiakop thoh essay kaba halor ka phang ban iada ïa ka shongkha khynnah lane “Prevention of Child Marriage, bad ïa kane la phiah ha ki shiphew tylli ki bynta, hadien kane ka prokram la buh ruh ki jingkylli ïa ki khynnah ha kaba ïadei bad ka jingma ka shongkha khynnah khnang ba ki khynnah kin sngewthuh kham bha ïa ki jingeh bad jingma kiba mih na ka shongkha khynnah.
Katba dang pynshai bad kylli ïa ki jingkylli ha kaba iadei bad ka shongkha khynnah, ki khynnah jong ka Star Public School ki la ïa shimbynta bad pynpaw ïala ki jingsngew kiba ktah ha ka imlang ka sahlang, kiba iatyngkhuh bad ki aiñ bad ki jingsngew ne emotion kiba mih na ka shongkha khynnah.
Ka bynta ba ïadei bad ka jingiakop thoh essay ka dei ruh ka rynsan kaba lah ban pynlong ïa ki khynnah ban sngewthuh kham shai ïa ka prokram kaba ïadei bad ka shongkha khynnah kaba don ka jingthmu ban pynlong ïa ka imlang ka sahlang kaba lait na ka shongkha khynnah.
Kaba kum kane ka prokram ka District Legal Services Authority (DLSA), East Jaiñtia Hills District ka la pynlong ruh ha Jawahar Navodaya Vidyalaya (JNV), Rymbai East Jaiñtia Hills District ha kaba la wan ban iashimbynta lang da ka Additional Public Prosecutor, East Jaiñtia Hills District, ka kong M. War, Deputy Legal Aid Defence Counsel, kong K. Challam, Assistant Legal Aid Counsel, kong K. Dkhar, u Principal Jawahar Navodaya Vidyalaya, Rymbai, u Dr. Raj Kumar lem bad ki khynnah skul.
Ka District Legal Services Authority East Jaiñtia Hills District ka la ai ka jingiaroh ïa ka jingia shimbynta lang ki bor pyniaid skul lem bad ki khynnah skul bad ka jingkyrshan lang ki lad pathaikhubor ha kaba pynphriang ïa ki jingpynshai paidbah ha kaba ïadei bad kane ka prokram ne ka campaign halor ka jingthmu ban lait na ka shongkha khynnah.