Khliehriat Rymphang 4: Kum shibynta ban tehlakam ban pynduh pyndam ïa ka shongkha khynnah, ka District Legal Services Authority (DLSA), East Jaiñtia Hills District, ha ryngkat ka jingïatreilang bad ka ASHA (Awareness, Support, Help & Action) Unit, East Jaiñtia Hills District, ka dang ïaid bteng ia ka jingialap paidbah bad la pynlong da ka Legal Literacy Programme kaba kynthup ruh ki jingialehkai skit ha surok lane Street Play, ïa ka prokram la pynlong ha kiba bun ki jaka kiba hap hapoh ka Wapung C&RD Block, East Jaiñtia Hills District.
Ïa kane ka prokram la pyniaid hapoh ka jingpeit ka NALSA’s ASHA SOP bad ka Bal Vivah Mukt Bharat Campaign bad la pynlong ha shnong Lad Rymbai Dongwah, Pamra Paithlu bad ha Ïongkaluh bad la sakhi ruh ïa ka jingwam ïashimbynta lang ki riew paidbah kiba na ki shnong ki thaw.
Ki jingialehkai skit ha surok (Nukkad Natak), ki la shim ïa ka bynta kaba donkam bha kum ka khubor kaba long kum ka jingpynshai bad pynbna paidbah halor ki jingma kiba ap na ka daw ka shongkha khynnah, namar ka shongkha khynnah ka ktah haduh katta katta ïa ka jinglong jingman ka met ka phad, ka ktah ïa ka pule puthi khamtam ki khynnah kynthei, ka ktah ruh ïa ka imlang ka sahlang.
Kane ka jingialap paidbah halor ka jingma na ka shongkha khynnah ka dei halor ka jingthmu ka Meghalaya State Legal Services Authority (MSLSA), Shillong bad ka National Legal Services Authority (NALSA) ban pynshlur ïa ki nongshong shnong ba kin ïa shimbynta lang ha ki prokram jingpynshai paidbah ban pynsngewthuh ïa ki jingma kiba mih na ka shongkha khynnah bad ban pynlong ïa ka imlang ka sahlang kaba lait na ka shongkha khynnah.
Ha ka prokram ba la pynlong ha kitei ki shnong bapher bapher la wan ban ïa don lang ruh ka Additional Public Prosecutor, East Jaintia Hills District, ka kong M. War, ka Legal Aid Defence Counsel, ka kong Cordially Melody Langstang, ka Deputy Chief Legal Aid Defence Counsel, ka kong P. Paswett bad ka kong R. Lyngdoh, u Assistant Legal Aid Defense Counsel, u bah W.D Sympli, ka Front Office Coordinator, District Legal Services Authority (DLSA), East Jaiñtia Hills District, ka kong Deinidaroy Papang lem bad ki muktiar kiba dei ki Panel Lawyers, ki nongtrei jong ka District Legal Services Authority, ki nongpyniaid shnong lem bad ki nongshong shnong.
Haba batai halor ki jingialehkai skit ha surok, ka kong M. War ka la batai shai bha ruh ia ki kyndon ba la mana kiba katkum ka aiñ Prohibition of Child Marriage Act, 2006, la ong ba katkum ka aiñ kino kino kiba dang don hapoh ka 18 snem kyrta ki dei kiba dang hapoh ka kyrta lane minor bad ka skit ka pyn phalang ba kumno ka shongkha khynnah ka ju jia dei na ka daw ka jingkheiñ sting lane ka jingsngewthuh bakla ïa ki kyndon ki aiñ.
Ka skit ka pyn phalang ruh ba ka ju don ka ka jingjia ba ki nongialam niam tang na ka daw ka jingbym tip bha ïa ka aiñ ki ju pyniathoh shongkurim ïa u shynrang uba dang 20 snem kyrta bad ka kythei kaba dang 16 snem kyrta bad haba bud dien na ki hospital ïa ka jingarmet ka kynthei kaba leit shim dawai, ki doctor kumba la pynkup bor da ka aiñ ki ju pyntip sha ki bor pulit bad la wan ban tuklar da ki bor pulit ha kaba ki ju kem noh ïa u shynrang bad ïa uba pyniathoh na ka daw ka jingpynkheiñ ïa ka aiñ.
Ka kong M.War ka la pynsngew ruh ba lada don mano mano ban pynshlur ïa kane ka shongkha khynnah yn pynshitom ïa ki katkum ki kyndon aiñ jong ka POCSO Act.
Kane ka campaign ne ka jingialap paidbah kaba ïadei bad ka jingthmu ban pynduh pyndam ïa ka shongkha khynnah ka dei kaba pynlong ïa ka Phase-II kaba buh thong ban pyndep hapoh 100 sngi ha ki district bad ïa kane ka sdang naduh ka 5 tarik u bnai kyllalyngkot haduh ka 4 tarik u rymphang 2026, la pynsngew ruh ba ki paidbah ki lah ban pyntip lyngba ka Helpline Numbers 1098 bad 15100 lem bad ka Bal Vivah Mukt Portal lada jia ba don ka shongkha khynnah ha kano kano ka jaka.
