Bteng ïaka jingtalasi ïa ki kali, tehlakam ïa u drok bad ki kam sniew kyrpad ka SRS ïa u SP ka Ri-Bhoi

Nongpoh, K’Lyngkot 12: Ka Synjuk ki Rangbah Shnong, Ri-Bhoi District mynta ka sngi kila leit ban ïakynduh syndon ïa u heh pulit ka Ri-Bhoi u Giri Prasad u ba dang shimti kum u Superintendent of Police ba thymmai ha kane ka district ban ïakren shibun ki kam khamtam ban wanrah ïaka shongsuk shongsaiñ ha kane ka district.
Naka liang ka kynhun ki Rangbah Shnong hapoh ka jingïalam u Bah BB Makdoh kum u Chairman, u Bah PB Sylliang General Secretary lem bad ki Rangbah Shnong na kylleng ki shnong kila kyrpad ruh ïa u SP ka Ri-Bhoi ban bteng ïaka jingtalasi kumba ju leh namar kane kala wanrah shisha ka jingduna ka jingiap briew bad ka jingjia aksiden ha Ri-Bhoi kaba dei kawei naki district kaba jur bha ki jingjia aksiden bad ki jingduh noh ki mynsiem briew.
Nalor katei ka jingkyrpad ban bteng ïaka jingtalasi, naka liang ki Rangbah Shnong kila kyrpad ruh ïaka tnad pulit ban ai ka jingtreilang bad ki Rangbah Shnong ban tehlakam ïaki kam sniew khamtam u drok bad kiwei kiwei ki jingdih buaid kiba wanrah ïaka jinghuri hura bad ka jingthud haka imlang ka sahlang ha kaba naka liang u SP u la kular ban ai ka jingtreilang bad ki Rangbah Shnong khamtam ban pynkhlaiñ ïaki VDP ha man ki shnong ban tehlakam ïaki kam sniew namar tang ki pulit ki shem jingeh ban pyndep ïala ka kamram hynrei da ka jingtreilang ka kti kamon kadiang jong ki Rangbah Shnong bad ki paidbah nongshong shnong kan pynlong ïa kane ka district kaba lait naki kam sniew.