Bteng biang ka ophis u DSO ïa ka lympung ïalehkai jong ki khynnah skul ka ‘Inter-School Subroto MCFT 2022’

Mawkyrwat, Jylliew 30: Ka ophis jong u District Sports Officer, South West Khasi Hills District, Mawkyrwat mynta ka sngi ka la ïoh ban bteng biang ïa ka lympung ïalehkai kynjatbol ba la tip kum ka South West Khasi Hills District Level Inter-School Subroto Mukharjee Cup Football Tournament 2022 ha madan Pynden-ïewlyngdoh, Nonglang.
Ha kane ka sngi la ïoh ban pynïalehkai ïa ki khynnah kiba hapoh ka 14 snem jong ki khynnah shynrang kata ha ka jingïalehkai kaba nyngkong ka long hapdeng ka Mawlieh Upper Primary School bad ka Balang Mawlangwir Higher Secondary School ha kaba ka Mawlieh UPS ka la jop da 5 – 0 ha kaba ïa ki kol la thep da u Kyrmenskhem Thongni ha ka minit kaba 14, u Dangïaipyrkhat Khar-dewsaw ha ka minit kaba 35, u Davidkelvin Syiemlieh ha ka minit kaba 39, u Wankyrshan Syiemlieh ha ka minit kaba 50 bad 56.
Nangta, ka Lumtyngum Secondary School, Jakrem ka la jop da 4 – 1 ïa ka Little Star Higher Secondary School ha kaba ïa ki kol la thep da u Pynskhemlang Kharwanniang (5 minit), u Khrawkupar Lyngkhoi (6 minit), u Ribhalang Kharwanniang (22 bad 43 minit) katba ka Little Star Higher Secondary School ka la ïoh ha ka minit kaba 53 na u Banjoplang Thongnirit. Ha ka jingïalehkai kaba dei hapdeng ka Nine Set Secondary School, Umjaraiñ bad ka Umjaraiñ Hotspring Secondary School ha kaba ka Umjaraiñ Hotspring Secondary School ka la jop da 1-0 kol lyngba u Silvester Thongni ha ka minit kaba 43.
Ha kawei pat ka jingïalehkai, ka Thiepdieng-ngang Presbyterian Secondary School ka la jop ïa ka Upper Mawbidong Secondary School da 6 – 0 kol bad ka Lyngdoh Wanniang Secondary School, Marshillong pat ka la jop da 8 – 0 kol pyrshah ïa ka Rising Secondary School. Sohkhyllam.