K a jingïakhih jong ki samla pule ka NEHU hapoh ka lama NEHUSU bad ka KSU NEHU Unit da ka jingshah thngan ka la rung sha ka sngi kaba Khatsan mynta bad kiba bun ki samla ki la poi hospital namar ba la hiar ka BP bad Blood Sugar, shitom ki nierbah bad shem shitom ban ring bad pynhiar mynsiem, hynrei u Vice Chancellor ka NEHU u Prof P.S Shukla pat u dang shim shuti na ka University khlem jingpyrwa bad salia halor kine ki kynrum kynram. Nalor kata katne u la ïohi ba ki samla pule ki la shah thngan hynrei u dang pyneh beit triang khlem salia namar haduh mynta um treh satia ban hiar shuki . Kane ka jingleh jongu ka pynpaw ba u dei u briew u bym salia, u bym don ka jingkitkhlieh bad uba mynthi sat bad uba eh dohnud. Bun ki samla pule ba shah thngan ki la hap ban shah ai drip, ai oxygen ha ki doctor. Katne lah jia hynrei ym don ba lah ban tem ïa kane ka jingïakhih. Ka jingdawa na ka liang ka NEHUSU bad KSU NEHU Unit ka long ban weng noh mardor ïa u Vice Chancellor (VC) lane u khlieh duh nongpynïaid jong ka skul bah NEHU lane ba u dei ban hiar shuki beit. Ki daw ba ki samla pule NEHU ki dawa ba u Vice Chancellor un hiar shuki noh mardor ki long kiba bun. Mynta lah bun bnai ba ki la pynsgew ïa ki jingdawa jong ki hynrei u Vice Chancellor u leh bym suidñiew.
Kum ban shu kdew tang kawei ka daw- Ki khynnah skul kiba sah hostel ha NEHU kim ïoh tang ka Wifi ba kin pyndonkam ban ïarap ïa ka jingpule bniah jong ki (research). Sa kawei ka jingdawa ka long ban thung noh ïa u/ka Pro-Vice Chancellor namar kane ka kyrdan ka long kaba donkam eh ha ki skul bah (University). U/ka Pro-VC ki long kiba lah bit bha ka kyrdan thoh bad pule bad ki dei kiba ai jingmut ïa u VC kumno ban leh ha ka liang ka jingpule bniah lane ka research bad kumno ban kyntiew ïa ka jingpule (academics) ha kane ka skul bah. Dei u/ka Pro VC kiba kham ïakynduh bha bad ki khynnah skul bad ruh bad ki nonghikai. Dei na ka jingbymdon Pro-VC kiba lah ban pynsngewthuh kham bha ïa u VC shanphang ki kam kiba kham hakhmat kiba u dei ban leh, ba sa mih ki jingkumar haduh katne.
Hooid kum ka jingpynbiej ïa ki samla pule kiba shah thngan u Vice Chancellor P.S Shukla shwa ba un shim shuti artat u la thung ïa ki arngut ki Pro Vice Chancellor na ka bynta ka Shillong bad Tura Campus. ïa kine la ïathuh ba u la thung tang na ka WhatsApp kaba pynlong ïa ki ban ym pat shimti ïa ki kam, Kine ki arngut ki long I Prof S.M Sungoh iba dei na ka Department of Education na ka bynta ka Shillong bad Prof Fameline K Marak na ka Department of Garo kum ka Pro VC jongka Tura Campus. I Prof Sungoh lei lei i la dei ban kiew kum ka Vice Chancellor namar i dei iba don ha ka list jong kiba dei ban kiew kyrdan Vice Chancellor ka NEHU, hynrei ïoh pynban da une u Prof Shukla u bym don wat tang ha ka list jong kiba dei hok ban ïoh ruh. Kane shwa ka la dei ka jingleh donbor jongka sorkar pdeng ban shu thung da ki briew jongka kiba kan shu kyrwait shabi beit na Delhi.
Kane ka dei kawei ka jingtlot jong u VC ba mynta jong ka NEHU. Nalor kata ka jingthung kam jong u khlem da ïaid lyngba ki lynti kiba dei ka la pynbitar ïa ki samla pule bad ïa ki nonghikai bad ki nongtrei NEHU baroh. U la thung ïa uwei u Colonel uba la shongthait na ka kam shipai ban long kum u Registrar ka NEHU. Ka kam u Registrar ka long ban ïarap ïa ki samla pule ha ki jingdonkam jong ki kiba bun jait. Hynrei haba ki samla pule bad wat ki nonghikai ruh ki leit ban donkam ïa u Registrar ki shah kren pynban da ki kyntien kiba khor la kumba ki long ki langrut shipai. Uta u Registrar imat u sngew ba u dei ban pynïaid kam kumba leh hapoh ka len shipai ban shu kyrhait bad shu ‘order’ beit kum ïa ki shipai langrut. Kane ka long ka jingeh haba thung da ki ophisar shipai ha ki skul heh ha kaba ka kamram jong U Registrar ka long ban pynsngewthuh da kaba jai jai ïa ki samla pule hana ki leit ïakynduh ïa u na ka bynta ban ïoh jingshai ha kiba bun ki liang. Ym tang katta, wat ia ki Deputy Registrar ruh lah shu thung jubor da ki briew kiba nabar jylla wat la ki don bun ngut kiba la thep dorkhas na ka bynta kine ki kam, kiba dei na kane ka jylla bad kiba long ruh ki briew kiba tbit ban trei ka kine ki kam.
Nalor kata man ba long ka jingïalang jong ki nonghikai ruh bun sa tang ka jingbym ïasngewthuh jingmut bad ka jingmih noh jyndat jong ki na ki jingïalang da ka jingbitar namar ba u VC um sngap satia ïa ki jingai jingmut jong ki. Ha kaba pyntrei kam ïa ka National Education Policy lane ka jingwanrah ïa ka rukom hikai thymmai kaba don ruh bun ki jingkylla, na ka liang ki nonghikai NEHU bad ki kolej kiba hap hapoh jong kane ka skul bah ki la pan por khyndiat shuwa ban pyntrei kam ïa kane ka jingbthah ka sorkar kmie hynri u VC Shukla ua la pyntrei beit shaid shaid.
Nangta ka jingpyntrei kam ïa ka Common University Entrance Test (CUET) ha kaba ki samla pule ki hap ban thoh eksamin ban ïoh rung kolej, ki lah mih bun ki kynrum kynram ha une u snem bad baroh lehse ngi kynmaw ïa ki jinghuri hura bad jingkulmar hi thlim ha kaba ki khynnah ki la shu ap shabar da ki kynta ha u slap bad kim tip haei ka kamra thoh eksamin jongki. Kane baroh ka la jia namar ba ym nang pynïaid kam satia uta u Registrar. Nalor kata namar kane ka CUET mynta bun ki khynnah pule jongngi ki hap ban leit thoh eksamin ban ïoh rung kolej sha kiwei pat ki jylla. Kane ka la buh ïa ki kmie ki kpa ha ka jingeh kaba khraw bha. Lada dei ba u VC u long uba shemphang un jin da la lah ban pynsngewthuh ïa ki bor kiba bat ïa ka tnat pule-puthi (Education Ministry) hapoh ka sorkar kmie ba ka CUET ka buh jingeh shibun eh ïa ki khynnah pule jongngi. Hynrei une u VC Shukla pat u shu kloi beit ban leh katba bthah na Delhi. Um don kata ka jingsngewlem na ka bynta ki samla pule riewlum kane ka thaiñ shatei lam mihngi. Dei kane ka jingbymdon jingsngewthuh ïa ka rukom im bad ka jinglong jingman jongngi kaba wanlam ïa ki jingeh shibun.
ïa mynta ngim lah tip kumno kan kylla ka lyer haba la shimti ïa ka kam da u Vice Chancellor Incharge u Prof Nirmalemdu Saha namar kumba ka paw ki samla pule ki pdiang ïa u kum u VC Incharge bad ula leit ïa kynduh ruh ïa ki samla kiba shah tngan bad kyrpad ïaki ban sangeh shah thngan noh shwa namar u la thung ïa ka Enquiry Committee ban tohkit halor ki kynrum kynram bad ban aiti sha ka tnad pule puthi jongka sorkar pdeng kata sha ka Committee jong ki arngut ki dkhot ba la thung da ka sorkar pdeng ban tohkit halor kine ki jingjia ha NEHU. Haduh mynta ki samla pule ki dang bteng beit ïa ka jingshah thngan namar ki dawa ba dei ban weng beit shwa ïa une u VC ba mynta u Shukla.
Ban weng ïa u VC donkam ka jingbthah na Delhi. Hynrei kumba ïohi mynta ha kine ki snem kiba lah dep ka sorkar kmie kam kheiñ snep eiei ruh ïa ki jingdawa jongngi na kane ka thaiñ shatei lam mihngi. Peit shuwa tang ka Manipur. Mynta lah shisnem-shiteng ka la don ka jingkulmar bad ki jingiap ki la kot palat 300 ngut ki briew bad kiba bun kiwei pat ki im ha ki refugee camp. Hynrei ka sorkar kmie kam patiaw satia. I kumba ong ieh ki mat ïa iap bad ïa pyniap para maki. Tip ïa kane ka phang jong ka NEHU ruh ki lah ban leh kumjuh. Kum ka jaitbynriew ngi la dei ban pyrkhat jngai ïa kine kiei kiei namar imat ngi la long tang ki khun shu ting, ym kiba dei hok ban ïoh ïa kaba dawa hok.
