Shillong, Naiwieng 11 : Ka Assam ka la lamkhmat nyngkong eh ha ka liang ka jingïoh khur takma ha ka sngi sdang jong ka Swimming jong ka 2nd North East Olympic Games 2022 da kaba khur haduh hynriew tylli ki takma ksiar, ha ka jingïalehkai ha Crinoline Swimming Pool hynne ka sngi Thohdieng, katba ka Manipur ka ïoh kawei ka takma ksiar. Katba ka Meghalaya ka khlem ïoh ban jop takma ha baroh ki kyrdan ïalehkai.
Ka Assam ka la khur ruh lai tylli ki takma Rupa bad ar tylli ki takma Rnong, katba ka Manipur ka khur saw tylli ki takma Rupa bad ar tylli ki takma Rnong. Ki lai tylli ki takma Rnong la ïoh khur da ka Tripura.
Ka Dishant Buragohain ka ïoh khur takma Ksiar ha ka 100m freestyle da kaba pyndep ha ka por 56.16 second, bud pat u Angshuman Kashyap uba dei jong ka Assam da kaba pyndep ha ka por 56.66 second. Prasanta Poddar jong ka Tripura ha ka kyrdan ba lai da kaba pyndep ha ka por 59.75 second.
Ha ka Women’s 100m freestyle la jop da ka Jahnabi Kashyap jong ka Assam (01:01.51), kaba la tam da san second ïa ka Darshita Baruah (01:06.96) jong ka Assam, katba ka Dekalu Th Panmei (01:10.65) jong ka Manipur ka wan ba lai.
Ha ka Men’s 50m breaststroke la ïoh rah da u Ningombam Jeson Meitei (00:31.75) jong ka Manipur, u Thouba Meitei (00:32.26) jong ka Manipur ha ka kyrdan ba ar bad u Mriganga Gogoi (00:32.51) jong ka Assam ha ka kyrdan ba lai.
Ha ka Women’s 50m breaststroke la jop da ka Disha Gogoi (00:37.38) kaba dei jong ka Assam, ka Nivrti Cherian Datta (00:39.34) jong ka Assam ha ka kyrdan ba ar bad ka Kangabam Kevashri Devi (00:40.72) jong ka Manipur ha ka kyrdan ba lai.
Haba phai sha ka Women’s 100m backstroke, ka Krishnali Doley jong ka Assam (01:15.59) ka la jop takma Ksiar, ka Laitonjam Jessica Chanu (01:16.79) jong ka Manipur ïa ka takma Rupa bad ka Adriza Rani Chetia (01:24.73) jong ka Assam ïa ka takma Rnong.
Ha ka 4x50m men’s freestyle relay ruh la jop takma Ksiar da u rangïalehkai ka Assam (01:44.19), Manipur ïa ka takma Rupa (01:49.46) second bad ka Tripura (01:54.56) ïa ka takma Rnong.
Ha ka 4x50m men’s freestyle relay ka Assam (02:05.25) ka khur takma Ksiar, ka Manipur (02:14.97) ïa ka takma Rupa bad ka Tripura (02:32.22) ka wan ba lai bad jop takma Rnong.
