Nongstoiñ, Lber 23: Ha ka step sngi balang ha ka por 10 baje ei ei, ki riew paidbah kiba shong ba sah ha ka dong Themiew jong ka shnong New Nongstoiñ, ki la lap ïa ka met ïap jong I khunlung (bym pat tip thikna kynthei ne shynrang) ba dang shu kha ïa kaba la shu bret da ka kmie. Katkum ka jingïathuh jong ki riew rangbah bad longkmie kiba lap, la ong ba itei I khunlung I dei I ba la shu pynkha jubor da ka kmie namar la ong ba I dang don la kumno kumno 5 ne 6 bnai na ka kpoh jong ka kmie.
Na ka liang u Bah Kynjai Thongni uwei na ki riew rangbah jong ka dong Themiew u ba ju bat ruh kum u Secretary dong baroh shikatta, u la ong ba la lap nyngkong da uwei u rangbah u ba sah ha katei ka dong katba u dang thmu ban leit donkam ha katei ka jaka ba ju thung jhur ba markhap bad ka khlieh iew Nongstoiñ.
La ong ba mar syn lap ïa ka met ïap ba la shu song malu mala bad ieh ha katei ka jaka, u la khot briew mar mar bad hadien katto katne por, ki nongïalam jong ka dong ki la pyntip sha ki pulit bad hadien ba la wan ki pulit ki la shimti noh ïa katei ka met ban leh post mortem bad ki dang pynlong ruh ïa ka jingtohkit bad jingthwet ïa ka kmie haduh mynta.
Na ka liang u Bah Kynjai Thongni u la pynpaw ka jingpynrem halor kane ka jingjia kaba pynhiar dor shisha ïa ka longbriew man briew bad ka imlang sahlang baroh kawei. U la ong ruh ba namar ka dei ka jingjia kaba la jia mar syndah bad ka dong Themiew, kumta ka dei ka kamram jong ka dong ban peit ban jngoh.
U la kyntu bad kyrpad jur ïa ka kmie jong itei I khunlung ba ka dei ban wan mih bad ai jingtip sha ki riew rangbah. U la kular ruh ba lada ka kmie kan wan mih noh kloi yn buhrieh ïa ka kyrteng jong ka na ki paidbah bad yn ym pynshitom satia ïa ka.
