Boycott ka HYC ïa ka dewbilat TOPCEM ha WKH, kyrpad ïa ki nongkhaïi ban ym die shuh

Nongstoiñ, Nailar, 27: Ka seng Hynñiewtrep Youth Council West Khasi Hills, ka la rai ban boycott ne pynsangeh ïa ka jingkhaïi ïa ka dewbilat TOPCEM ha West Khasi Hills, namar ka jingjia shah thombor ki paid nongïakhih pyrshah ïa ka jingthmu pynheh kane ka kompeni ïa ka karkhana ha Thangskai, East Jaiñtïa Hills.
Ka HYC West Khasi Hills ha ka sngi saitjaiñ, ka la sam ïa ki shithi lyngba ki Unit ba kynthup ïa ka Nongstoiñ, Mawshynrut bad Rambrai Circle, sha ki nongkhaïi dewbilat hapoh ka District, ban kyrpad ïa ki ban sangeh noh ha ka ban shim ne die ïa ka dewbilat TOPCEM.
“Kum ka seng ngi pang ka mynsiem ban ïohi ïa ki para ri ki para doh kiba shah khñiot beiñ, kiba shah leh beiñ bad kiba shah shoh shah bom ha ki Pulit, lyngba ka jingkynshoit ki trai bad ki nongtrei katei ka karkhana dewbilat ha Thangskai, ki bym kheiñ shuh ïa ki kynthei haduh ba bun ki la mynsaw”, ong ka kyrwoh na u President Lumlang Kharsyiemlieh bad General Secretary Wantei Lyngdoh.
“Ngim lah ban shu sngap halor kane, kumta ngi kyrpad ïa phi ki nongkhaïi dewbilat ka thaiñ ba kin sangeh noh ban shim ne die ïa ka TOPCEM kaba la pynmih na Lumshnong, East Jaiñtia Hills District”, ong ka kyrwoh na ki nongïalam ka seng.
Ka HYC ka ong ba da ka jingkyrshan jong ki nongkhaïi dewbilat, ka sngew ban ong ba katei ka kompani kan ym ïohlad shuh ban leh ba heh. Ha kajuh ka por kan pyntlot noh ïa ka jingïoh kamai kaba shu kjit na ki trai shnong ka Jylla.
Ha kajuh ka por, ka HYC WKH ka buh jingkylli ïa ka tnad Pulit ka East Jaiñtia Hills ba hato ki la shah pynïaid ha ka TOPCEM haduh ba kim salia ban shoh bad bom ïa ki paidbhur kiba ïakhih ban ïada ïa ka mariang bad ki jingmyntoi jong ki trai shnong.
Ka seng khatduh eh ka buh ïa ka jingkyrpad ïa ki paidbah ka West Khasi Hills baroh kawei, ba kin ym thied shuh ïa ka dewbilat TOPCEM, namar kaei kaba la jia ïa ki paidbah ha katei ka jaka ka long ka bym lah ban pdiang da lei lei hapoh ka Jaidbynriew.