Bom ïap ki paidbhur ïa u I Love You, u Lodestar, u Marsanki bad u Shidorki ha Shangpung, lait phet 2 ngut

Shillong, Nailur, 11: Saw ngut napdeng ki hynriew ngut ki runar kiba la lait phet na ka phatok ne District Prison & Correctional Home, Jowai, ha ka sngi Saitjaiñ ki la ïap ha ka jingshah tangon ha ki paidbhur ha ka shnong Shangpung ha ka sngi u Blei ha kawei ka khlaw jong ka tnat Forest kaba don ha khappud jong ka shnong Muthlong bad ka shnong Shangpung, West Jaiñtia Hills District.
Kine ki saw ngut ki runar kiba la shah bom iap ki kynthup ïa u I Love You Talang, u Lodestar Tang, u Marsanki Tariang bad u Shidorki Dkhar.
U Inspector General of Prisons, u JK Marak u la pyntip lyngba ka telephone ba ka dei ka khubor kaba shisha ba kine ki saw ngut ki la shah kem ha ki paidbhur bad bom ïap ïa ki. Ki Ophisar jong ngi ki dang leit sha kane ka jaka bad nga dang ap ban ïoh shuh shuh ïa ki jingtip.”
Ka thymmei khubor ba la ïoh lum ka la ïathuh ba u Ramesh Dkhar u lait phet da ka said na ka kti jong ki paidbhur katba uwei pat u koidi uba la lait phet lang na Phatok bad ka kynhun jong I Love You, u dei u Rikmenlang Lamare u bym don satia ha kane ka jingjia.
Kine ki saw ngut ki runar ki la shah kthong ha ki paidbhur hadien ba uwei na ki u la leit ban thied jasong na kawei ka dukan ha ka shnong Shangpung. Hynrei ki briew kiba dang dih sha hapoh kane ka dukan kiba ithuh ïa ka dur khmat jong une u runar ki la pyntip mar mar sha ki para shnong bad dei ha kane ka khyllipmat ba ki paidbah jong ka shnong Shangpung ki la khih buk ban mih da u shnong ban kthong la kumba leit sikar ïa kine ki runar kiba la phet sha ka jaka khlaw kaba don ha khappud jong ka shnong Muthlong bad ka shnong Shangpung, West Jaiñtia Hills District.
Lyngba ki video ba la saphriang ha ka rynsan jong ka Social Media la ringdur ba kine ki saw ngut ki runar ki la shah tangon ha ki paidbhur haduh ban da jem jai. Namar ka jingphlei shaba palat ka snam, kine ki saw ngut ki la ïap hashen.
Ha kaba ïadei bad kane ka jingjia, ki Pulit tang shu ïoh jingtip ki la leit mar mar sha kane ka khlaw ban shimti ïa ka met jong kine ki saw ngut.
U Superintendent of Police ka West Jaiñtia Hills u B.K Marak u la ïathuh ba ki Pulit Officer tang shu ïoh jingtip halor katei ka jingjia ki la leit marmar sha Shangpung ban pynlong ïa ka jingtohkit bad ban pyndep katkum ki jingdonkam jong ka aiñ.
Ha kaba ïadei bad ka jinglait phet jong ki san ngut ki runar lem bad uwei u koidi na Phatok ki Pulit jong ka West Jaiñtia Hills District ki la kem noh ïa u Head Warden bad ïa saw ngut ki Warden kiba trei hapoh ka District Prison & Correctional Home, Jowai.
Kum ban shu pynkynmaw, kine ki hynriew ngut ki runar ki la lait phet na kane ka Phatok hadien ba ki la shoh pynmynsaw ïa ki saw ngut ki nongtrei jong kane ka Phatok, kynthup ïa uwei u Pulit uba ap pahara.
Ha kane ka jingshah thombor, uwei u nongtrei jong ka Phatok bad une u Pulit ki la mynsaw. Ïa kine ki arngut kiba la mynsaw la pynkit noh sha Jowai Civil Hospital ban ïoh ïa ka jingsumar.
Katkum ka thymmei khubor ba la ïoh lum, la ïathuh ïa kine ki san ngut ki nongtrei jong ka Jowai District Jail hadien ba la kem ïa ki, la register case ruh mardor pyrshah ïa ki halor kane ka jinglait phet jong kine ki runar na along.
U Superintendent of Police ka West Jaiñtia Hills u la ïathuh ba ïa kine ki san ngut la register case ha Jowai Police Station.
Ki hynriew ngut ki runar kiba la lait phet na kane ka Phatok ki kynthup ïa u Rikmenlang Lamare, u Shidorki Dkhar, u Lodestar Tang, u Marsanki Tariang, u Ramesh Dkhar bad ïa u I Love You Talang.
Kine ki hynriew ngut ki la lait phet na Phatok da kaba ïa suhbuit ban shim kabu ha ka por dih sha sngi.
Dei ha ka por 1:00 baje nohphai sngi katba u nongtrei jong kane ka Phatok u la rung sha ki along ba la set ïa ki ban ai sha ïa ki la thombor shwa ïa u.
Kane ka kynhun runar ka la shoh pat sa ïa uwei u nongtrei Phatok ha ka khyrdop kaba ar bad nangne ki la ïohlad ban plie ïa ka khyrdop bad poi sha ka ophis jong ka Phatok.
U Pulit uba ap pahara tang shu ïohi ïa kine ki runar kiba la pyrshang ban phet u la siat kuli sha suiñ kum ka jingmaham hynrei kane kam shym la pynsheptieng eiei satia ïa ki namarba ka thong jong ki ka long beit ban ïoh phet na phatok. Kine ki runar kiba la tur beit beit sha u ki la ïakhun bad ïoh dung da ka tari na ka khlieh jong u bad lait phet syndon na ka Phatok.
Kat haduh ba la thoh ïa kane ka khubor, ki Pulit ki dang pynlong ka jingthwet kaba jur ban ïohkem ïa u Ramesh Dkhar bad ïa u koidi ba la shah rai pynrem u Rikmenlang Lamare.