Bluit mih u Dr. Evarist Myrsing ban ïa khun na Mawhati Constituency

Nongpoh, Nailar 02: Kum u samla ba la paw ha ka them Ri Bhoi bad ha ka jylla hi baroh kawei, u Samla Evarist Myrsing bad uba la ioh ruh ïa ka kyrdan Doctorate halor ki synñiang ki bynhei kiba la shakri na ka bynta ka imlang ka sahlang bad ban pynjanai bad ban dang lah shuh shuh ban trei na ka bynta ki paidbah ha kaba khatduh u la shim ka rai rangbah ban rung noh sha ka jylli ka sain pyrthei na ka bynta ban pyndep ïa ki jingangnud kiba u kwah ban shakri na ka bynta ki paidbah.
Na ka liang u Samla Dr. Evarist Myrsing ha kane ka kynti u la shim ka rai ban khun na Mawhati Constituency bad la pynskhem ruh ïa u u kyrtong ka BJP na Mawhati bad ka thong kaba u angnud ka dei na ka bynta ka jingkylla hapoh katei ka Constiteuncu, ha RI Bhoi bad ha ka jylal hi baroh kawei.
Khyndiat haba phai sha ka jingim bad ka jingïaid lynti jong u Dr. Evarist Myrsing, u dei u uba shong basah ha ka shnong Mawtari Thaiang, Ri-bhoi Meghalaya. La kha bad la pynheh pynsan ïa u ha ka shnong Nongrim Nongladaw bad la phah skul ïa u ha Little Flower Higher Sec. School, Mawbri. U dei u khun ksiew ka (Lt) Drose Myrsing bad u khun phrangsngi jong ka Kong Martina Myrsing & (Lt) Bah Jewan John Matlang. Ka shnong trai jong ki kmie ki kpa jong u ki dei kiba na Mawtari Thaiang bad dei na ka jing lynshop arsien jong ka khlam Cholera & Dysentery ha ki shnong Pamphlang, Ïamkhon bad Mawtari ba ka jingïap ka lah ktah palat ïa ki 16 iing ha kito snem 1958 & 1960. Ki la mih noh ban sah sha Sonidan bad u kpa rad jong ki u (lt) Lek Dorphang u la ïalam noh ban sah katto katne snem sha shnong Umalaiteng. Ha dien ka jingkhlad noh jong ka kmie-rad jong u ki la wan poi bad sah noh ha Nongrim Nongladaw haduh mynta mynne bad u Evarist u la leit phai biang sha la shnong trai ha Mawtari Thaiang.
Ha u snem 2004 u la pyndep ïa ka Matriculation na MBOSE Little Flower Hr. Sec. School Mawbri, ka Pre-University Courses na Christ Jr. College, Bangalore, Ka Bachelor ha ka Philosophy (Indian & Western) na Vishwa Jyothi Don Bosco College, Warangal-AP bad ïa ka English Literature na ka skul bah Kakatiya University, Telangana. U la pyndep ïa ka Master in Social Work na IGNOU, New Delhi. U dang don ha pdeng ka jingpule ban pyndep ïa Post Graduation Diploma in Environmental Sustainability Development na IGNOU, New Delhi. U dei u samla uba don ka jingieid ba kyrpang ïa ka Mei Mariang, ka rep ka riang bad u long ruh u nong ïalehkai sports ha ka Football, basketball, volley ball bad u nongmareh sports.
Kum u samla uba la biang pura ruh ha ka kyrdan pule, u la dep ban pynkylla ïa ki kot phareng na ka ktien phareng sha ka Khasi kumba 6 tylli ki kot kiba kynthup ïa ki kot ba la ai kyrteng, ‘Ka Bor Bakhraw ha ka Kyrteng u ‘JISU’, ‘Ka Jingkyntiew Kurim Pher/khleh Niam ne bad kiwei ki Jaitbynriew, ‘U John Bosco bakhuid’, “Ka Klara bakhuid, ‘U Elias Kuriakose Chavara Bakhuid bad ka Kot ba la ai kyrteng, ‘Ka Alphonsa Bakhuid’.
Ki kam kiba u Dr. Evarist Myrsing u la trei ban kyntiew ha ka imlang ka sahlang, ha ka tnad pule puthi bad ki khusnam kiba u la ioh pdaing ki long ba u la trei kum u nonghikai skul kumba 7 snem tam, u la trei 1 snem tam kum u Resource Person bad ka Consortium of Resource Persons-ha ka shatri jong ka MySPACE – State Council of Science, Technology & Environment. U la trei 3 snem tam ruh kum u Senior Academic Mentor bad ka Bharti Foundation kaba ïatreilang bad ka Education Department halor ka Quality Support Program ha Jaiñtia Hills.
Shuh shuh, u la trei mon sngewbha kum u Project Facilitator bad ka NotOnMap, Meghalaya ban ïatreilang bad ki samla kumno ban kyntiew halor ka kam jngoh kai pyrthei ha ki nongkyndong bad ki longkmie ban ieng ha la kjat. Ki katto katne ki shnong kiba la ïatreilang ha shuwa ka Lockdown Covid-19. U la ioh pdiang ïa ka khusnam International Education Awards-2020 for contribution towards education community ba la lah ai da ka KITES Foundation-Knowledge Innovation Technology Entrepreneurship & Sportsmanship, YUVA Innovator & School Fest, New Delhi. U la trei mon sngewbha kum u wei u active member ha ka World Human Rights Protection Commission (WHRPC) bad u la ioh ka khusnam-Honoris Causa halor ka Social Work (Education). U la trei mon sngewbha kum u President jong ka International Community of the Divine Saviour (ICDS-Lay Salvatorians) ha ri India & Sri Lanka jong ka Indian Mission Vicarate. U la trei ruh kum u wei na ki Nongseng & Executive member jong ka 20 Shnong Multipurpose Cooperative Society, Ltd ha Liarbang.
Dei halor ki nongrim bad ki jingangnud kiba u kwah ban lur ïa ka lyngkha sah shrah ka Mawhati, u Dr. Evarist Myrsing u la shim ka rai ban ïa khun na ka BJP party na Mawhati, namar dei tang ha kane ka party kaba don ha ka liang ka jingsynshar hapoh ka ri, kaba u lah ban pynurlong ïa ki jingangnud lada ki paidbah ka Mawhati Constituency ki kloi ban pynjop don burom ïa u ha kane ka election 2023 hapoh ka jylla.