Bitar u Myntri, hukum ïa ka MSOA ban pynbiang jaka sah bad bam ïa ki Nongialehkai M’ya Games

Shillong, Jymmang 2 : U Myntri ka tnad kam ïalehkai Sport u bah Banteidor Lyngdoh mynta ka Lah Sngi U Blei, ula kiew jingbitar lep hadien ba ula ïoh jingtip ba la pynsah ïa ki nongïalehkai Meghalaya Games ha ki jaka bym biang bad kiba khlem pynkhuid satia bad mar mar u la hukum ïa ki nongïalam ka Meghalaya State Olympic Association (MSOA) ba ki dei ban pynkynriah mardor ïa ki nongïalehkai na ka jaka ba la pynsah ïa ki bad pynsah ïa ki sha ki jaka ba khuid ba suba kiba biang ki jaka sum jaka sait bad kumjuh ruh ba dei ban ai ka bam ka dih kaba biang kaba paka ïa baroh ki nongialehkai.
“ Ngi na ka liang ka tnad Sport ngi la dep aiti ha ka MSOA ban pynïaid ïa kane ka Meghalaya Games, ngi la mang 2.20 klur tyngka na ka bynta kane ka jingïalehkai bad na katei la dep pyllait ruh 1.20 klur tyngka sha ka MSOA ba kan peit ba ka jingpynkhreh pynkhrum kan long kaba bit ba biang bad ïaid beit ïaid ryntih, kumta nga sngewsih bad sngewbitar haba nga la ïoh jingtip ba ki jaka sah bad jaka sum kim biang ki jaka leit bar ruh kiba jakhlia bad ka bam ka dih ruh kam biang. Na kata ka daw nga la hukum ba ki dei ban pynbiang mardor lym kumta ka tnad sport kan hap ban leh ei ei” ong u bah Banteidor.
Shuh shuh u la ong “ Nga la ïoh pdiang ki jingujor kiba thikna ba ki jaka sah, ki painkhana, ki jaka sum bad wat ka bam ruh kim biang satia na ka bynta ki nongïalehkai Meghalaya Games. Kumba la dep aiti kane ka Meghalaya Games ha ka MSOA ban leh ïa kaba donkam nadong shadong bad ka tnad sport ka khlem tuklar shuh, kumta nga la hukum ba ki dei ban shim khia ïa kane ka kam mardor namar ym dei ban shu pynsah mata madei ïa ki nongïalehkai sport” ong biang u Myntri ka tnad Sport.
La ïoh jingtip hadien kane ka jingkiew bitar bad hukum jong u Myntri ki dkhot ka MSOA ki la wan ïa mareh sha ki jaka sah ki nongïaleh bad ki la kular ban ai noh da ki jaka sah, ki jaka sum, ki painkhana ba khuid bad ka bam kaba biang ïa ki.
Hadien ba ki nongïalehkai ki la ïohi ïa ka jingbym biang ka jaka sah, jaka sum, ki painkhana bad wat ka bam, ki la ujor bad ki la don ruh kiba shondur bad pynsaphriang ha ki social media ïa ki jaka ba la pynsah ïa ki namar la shu pynsah la kum ki mrad shisha.