Bitar u Conrad ba byrngem ka Boundary Committee jong ka KHADC ban ujor sha Ïingbishar.

Shillong, Ïaiong 27 : U Myntri Rangbah ka Jylla Conrad K Sangma ha ka sngi Balang u la khyrwit da kaba tyngeh ïa ka Boundary Committee jong ka KHADC hadien ba ka la byrngem ban tied ïa ka jingkhang jong ka Ïing Bishar haba ïadei bad ka jingsoi MoU pynbeit pud hapdeng ka Meghalaya bad Assam ha ka kylla ba nyngkong.
Haba kren ha ka jingïalang jong ka National People’s Youth Front kaba long ha ha Soso Tham Auditorium, u Conrad ba dei ruh u National President ka NPP u la ong ba katei ka rai ban leit sha ki bor ka aiñ kadei ka rai shimet bad ki dkhot ka NPP kim don bynta ei ei halor katei.
“Ki don ki riewshimet, ngam ong ba kadei ka Autonomous District Council ngan ong ki riewshimet kiba pynbna paidbah ba ki kwah ban ïaid da ka lynti ka aiñ. Ailad ba ngan pyntip ïa kito ki riewshimet ba ki MDC jong ka NPP kim don bynta satia halor kane,” la bynrap shuh shuh u Conrad.
Nalorkata, u ong ruh ba kito kiba kren ki don bynta lang ruh ha ka por ba ïaid ka jingïasyllok bad ka jingïakren halor ka jingpynbeit pud.
“Balei mynta pat phi pyrshang ban sdang wan leh politik na kane. Dei ki riewshimet ngam ong ba dei ka party ne seng ne ka District Council. Ngim sngewtynnad ïa kane ka jingleh. Haba ngi la rai ban leh lang ïa kane kum ka kynhun synrop, kumta baroh ki dkhot jong ka kynhun synrop ki dei ban ïatylli ha kano kano ka rai. Ki seng sain pyrthei nakito ki party ki la don lang ha ka por ba soi ïa ka MoU, u Myntri na kato ka party u la donlang,” la bynrap biang u Conrad.