Nongpoh, Jylliew 24: Tang hadien ka jingujor ki nongïalam shnong lem bad ki paidbah na ka shnong Umroi Nongrah bad Umroi Jaiawpdeng, kiba la kynduh jingeh halor ka jingbym lah ban pyntrei bha ïa ki skhim sam umbam sha ki paidbah ha kitei ki shnong, u MLA Umroi ha ryngkat ki heh ophisar na ka PHE, ha ka sngi baar ki la leit sha kitei ki shnong, khnang ban tip ïa ka jingshisha halor ka jingbymlah ban pyndep kloi ïa ki skim sam umbam ha kitei ki shnong.
Ïa ka jingjurip bad ka jingïalang kaba nyngkong, la pynlong ha Ïingdorbar Umroi Nongrah, ha kaba nalor ka jingdon u Damanbait Lamare, MLA Umroi, la sakhi ruh da ka jingdon ki heh ophisar ka PHE, kiba kynthup ïa u Bah Robert Nongbri, Chief Engineer ka PHE ha jylla, u Bah Damian Umdor, Additional Chief Engineer PHE, ka Superintending Engineer, Shillong, EE PHE Umsning, SDO lem bad kiwei.
Hadien ka jingïalang na Umroi Nongrah, u MLA ha ryngkat kitei ki heh ophisar ka PHE, ki la leit wad jingtip na ki nongïalam shnong ka Umroi Jaïawpdeng, namar ki paidbah hapoh katei ka shnong ruh ki kynduh jingeh bha halor ban ïoh ïa ka umbam umdih kaba thikna.
Lyngba katei ka jingleit jurip, u Chief Engineer, u la bitar ïa ki ophisar kiba dei peit ïa ka jingpyntreikam ïa ka skhim sam umbam hapoh kitei ki shnong, ha kaba u la ong ba katei baroh ka jia dei namar ka jingbym shimkhia ki ophisar, kiba kynthup naduh ha ka kyrdan SE, EE bad SDO da kaba ong ruh ba kan bha ïa ki ban nym bam tulop lada kim lah ban trei bha ïa ka kam.
Namarkata, lyngba katei ka jingïalang, u la hukum ïa ki ba la kumno kumno ki dei ban pyndep noh hapoh 2 bnai bad ba baroh ki paidbah hapoh kitei ki shnong, ki dei ban ïoh ïa ka umbam umdih kaba biang bad kaba thikna.
Haba ïadei bad katei ka jingbuh por u Chief Engineer, na ka liang u EE ka Umsning Division, u la kular ba un leh ïa kaba donkam baroh bad ba un sa ïakren bad ki kontraktor kiba ïoh ban pyntrei ïa ki skhim sam umbam hapoh kitei ki shnong.
Halor katei ka jinghiar ki hehduh jong ka tnat PHE, na ka liang ki nongïalam shnong Umroi Nongrah bad Jaïawpdeng, ki la ai ka jingïaroh ïa u MLA, namar ba u la shimkhia shisha halor katei ka kam, ba ki paidbah hapoh kitei ki ar shnong, ki la kynduh jingeh.
