Shillong, Lber, 19: Ki longkmie Garo kiba don hapoh ka shatri jong ka Mothers’ Union ha ka sngi Baar ki la ïakynduh ïa u Deputy Commissioner jong ka West Garo Hills u Jagdish Chelani ban pan jingpynshai halor ka jingpynpra ïa u Cenotaph ne u motsahnam ba la tei pynsahnam ïa ki Garo kiba la len lade ban leit sha ka Thmabah Pyrthei Baar.
Ki nongïalam jong ka Mother’s Union ha ka dorkhas ba la aiti sha u Deputy Commissioner ki la pynpaw ba une u mot u la long u mot sah jingkynmaw ïa ki paidbah ka rilum Garo ïa kaba u Deputy Commisioner ruh u la kular ba kam shym don satia ka jingthmu ban tei ïa ka Commercial Complex ha ka jaka ba ieng u Cenotaph ha Lower Babupara bad ïa kane ka jaka yn pynkylluid na ka bynta ban tei ïa ki mot sahnam jong ki riewpawkhmat.
“Hynrei, ngi sngewsih ban pyntip ba kine ki jingkular ki long tang ban shu ïalam bakla,” la ong ka Union.
“Ka jingkren jong u Deputy Commissioner ka la pynbitar bad ka pynmong ruh ïa ka jaidbynriew jong ngi, kiba sngew ba ïa ka jingsngew jong ki ym shym la kheiñ snep. Ka jingphiel ban burom ïa ka kyrdan kaba u bat bad ka jingshanïa kaba la buh ha u ka long ka bym lah shuh ban pdiang,” ong ka Union.
“Ka jingsngewkhia jong ngi ka la nang pynskhem shuh shuh haba uwei u nongshong shnong uba don ka jingsngewkhia u la wan sha ka Mother’s Union hadien ba u la pan jingtip lyngba ka RTI na ka Tura Municipal Board ha ka 20 tarik, Rymphang, 2025. Ka jubab ba la ïoh ha ka 24 tarik , Rymphang, 2025, ka la pynthikna ba ka projek ka dei ka Commercial Project, kaba long markhongpong bad ka jingkam jong u Deputy Commissioner,” la pyntip ka Union.
“Ka jingshetkylla ïa ka jingshaniah ka la pynlong ïa ka jaidbynriew jong ngi ban sngewsih bad mong. Ngi dawa ïa ka jingkitkhlieh na u Deputy Commissioner bad ngi kyntu ïa u ban burom ïa ka jingsngew jong ki paidbah kiba u shakri. Ka Mothers’ Union ka ieng tylli kawei ban pynneh pynsah ïa ka pateng jong ngi bad ban pynthikna ba ïa ka sur jong ka imlang sahlang jong ngi dei ban sngap,” la bynrap ka Union.
“Ngi kyntu ïa ki bor ba dei peit ban pynbeit ïa kane ka jinglong jingman bad ban ïashim bynta ha ka jingïakren kaba shai bad ki nongshong shnong jong ka rilum Garo,” la bynrap shuh shuh ka dorkhas na ka Union ba la soi da ka Secretary ka GB Sangma bad ka President ka Sabina K. Sangma.
