Bitar ki samla pule ïa ka jingdkoh treikam ki bor pynïaid ka NEHU

Shillong, Jylliew, 02: Ka long ka jinglehraiñ ïa ki bor pynïaid jong ka skulbah North Eastern Hill University, Shillong, hadien ba ki samla pule ki la sei madan ïa ka jingdkoh treikam hapoh kane ka skulbah kat haduh ba ka la ktah lut nadong shadong ïa ki samla kiba pule ha kane ka shlem ai jinghikai kaba hap hapoh ka jingpeit jong ka Sorkar Pdeng.
Ïa kane la sakhi ha ka sngi ha ka sngi Palei ha kaba da ki spah ngut ki samla pule shynrang bad kynthei jong kane ka skulbah kiba don hapoh ka lama jong ka North Eastern Hill University Students Union (NEHUSU) ki la pynlong da ka jingrah plakad hapoh ka phyllaw jong kane skulbah kum ka jingpyrshah ïa ka jingleh mynthi bad ïa ka jingbym shimkhia jong ki bor ba dei peit ïa ki mat jingdawa kiba ka Union ka ladep pynsngew la kumba katto katne por.
Ki jingdawa kiba Union ka la buh hakhmat ki bor pynïaid jong ka skulbah NEHU ki long ban thung noh mardor ïa ki nonghikai ha ki post ba dang sah thylli ha ki Department bapher bapher, ban peit ïa ka jingdkoh halor ka pule ka puthi, ban pynbiang ïa ki Bos kiba leit shaw bad leit on ïa ki samla pule manla ka sngi, ban maramot ïa ki jaka sah hapoh Hostel, ban pynbeit ïa ki jingeh hapoh ki Department jong kane ka skulbah, ban pynbiang ïa ki lad ai jingsumar na ka bynta ki samla pule, ban pynbiang ïa ki jingduna jong ki kot pule hapoh ka Library bad kiwei kiwei de ki mat.
Ki samla pule kiba la ïalum khrui ha ka por mynstep, ki la sdang ïa ka jingïaid paidbah nakhmat jong ka Library ter ter shaduh ka ophis treikam jong u Vice Chancellor u Prof. P.S Shukla.
U Vice Chancellor um banse ban mih na kamra treikam hadien ba ki samla pule ki la pyrta shla da ki sur pynrem hakhmat ka ophis treikam jong u.
Khnang ban pynjem ïa ka jingbitar jong ki samla pule, u Vice Chancellor u la kular ban pynurlong shwa tang 5 tylli ki jingdawa na ki 20 tylli ba ka NEHUSU ka la buh hakhmat ki bor pynïaid ka NEHU.
Ki san tylli ki jingkular ki long, ban pynurlong noh mardor ïa ka jingdawa ban buh Wifi ha ki Hostel basah ki samla pule, ban pynbiang kham bun tylli ki Bos ki ban leit shaw bad leit on ïa ki samla pule manla ka sngi, ban pynbiang ïa ka bam kaba bha bad ka umbam umdih hapoh Hostel, ban pynbiang ïa ki dawai dashin hapoh ka Health Centre kaba don ha NEHU Campus bad ban maramot noh mardor ïa ka jot ka pei jong ki Hostel.
Katba ïa ki khatsan tylli kiwei pat ki jingdawa, u Vice Chancellor u la ïathuh ba yn sa nang pyndep suki suki kawei hadien kawei pat.