Bitar ki Pulit bym kheiñ snep ki nongñiah ar shaka, bteng ka jingleh stunt ha ka sngi u Blei

Nongpoh, Naitung, 13: Ka jingbym kheiñ snep jong ki nongñiah ar sha ka ïa ki pulit ka Ri-Bhoi khamtam ha ka sngi u Blei, ka la pynbitar shisha ïa ki bor pulit ka Ri-Bhoi kiba ym don por shuh wat tang bam bamja ban dihsha hynrei ban hap shu beh thong ïa ki nongñiah ar sha ka kiba ju ñiah khyllew ha ki surok ban bat ïa ki bad ban ïada na kano kano ka jingjia ba sngewsih.
Lah ruh ban kdew hangne ba ka sngi u Blei ka la kylla long ka jaka mareh thong bad ka jaka ñiah khyllew ki ar sha ka ha surok bah National Highway 6 kaba buh jingma ym tang ïa ka jingim jong ki ba leh ïa katei ka kam hynrei wat ki hajar ngut ki nongleit nongwan kaba wanrah ka jingtieng jingsyier namar kitei ki samla kim kheiñ snep satia bad kim pyrwa ïa ka jingmynsaw bad wat ka jingjia ba sngewsih namar I kumba ki pan kwah ïa kaei kaba ki pulit ki ju maham bad daiñ kuna ruh kumjuh.
Na ka liang ki pulit ka Nongpoh Traffic Police mynta ka sngi u Blei ha ka jaka ban kham pynsuk bad pynaram ïa ka kam kaba ki trei pynban ki hap ban beh thong ïa ki nongñiah ar sha ka ha kylleng ki jaka naduh mynstep bad kim don por wat tang ban bamja ban dihsha bad kane ka la pynbitar shisha haduh ba uwei ophisar pulit um banse ban kren syndon ïa ki kmie ki kpa ba ki dei ban sneng bha ïala ki jong ki khun bad kumjuh sha kitei ki samla kiba ju sngew sarong ban ai bike ai scooty ïala ki jong ki khun ban ñiah khyllew ha ka sngi u Blei.
Tang hadien ka jingtalasi jong ki pulit, la ioh jingtip ruh ba kawei ka ar sha ka kaba don ïa u nombar ML 05 K 3280 ka la kylla namar ka jingpynher stet palat ha ka thaiñ Quinine bad ha katei ka jingjia baroh arngut u nongñiah bad u ba shong nadien ki la mynsaw jur bad la pynkit mar mar sha Hospital ban ioh jingsumar mardor.
Haba kren sha ki lad pathai khubor na ka liang u Bah B Thangkhiew da ka mynsiem kaba sngewkhia u la kyrpad ïa ki kmie ki kpa jong ki samla kiba ju mlien ban wan ñiah stunt ha ka sngi u Blei ba ki dei ban da sneng bha ïa ki bad kim dei ban ai shabi ha ka sngi u Blei ban wan ñiah khyllew sha surok bah namar ynda ki la mynsaw bad dkoh kin sa jynjar maki hi bad teng teng ka jingmynsaw kam dei tang ïa ki hynrei wat kiwei ruh kiba leit ba wan.
Kum u pulit ophisar u ba ju leit ban kthong ïa ki ar sha ka, kiba pynkheiñ aiñ u la dap da ka jingbitar namar kane kam dei shuh ka sien ba nyngkong hynrei ki pulit na ka por sha ka ki la maham bad daiñ kuna hynrei kam don satia kano kano ka jingkohnguh ban bud ryntih ïa ki kyndon aiñ bad kum ki pulit ki la maham da kaba tyngeh nalor ka jingdaiñ kuna, u la bynrap.