Nongstoiñ, Lber 22: Ka jingbym trei pyndep jong u kontraktor ïa ka surok na Mawdiang shaduh Mawkyllon, kaba ka jingjngai ka long tang kumba ar kilomitar shiteng, ka la pynlong ïa ki nongïalam jong ka Synjuk Nongsynshar Shnong Nongtrai Sepngi bad ki paitbah ba kin diaw mynsiem haduh katta katta bad ban kynthoh laiphew jait.
U bah Birbor Riangtem nongïalam ka Synjuk haba ïakren bad u nongthoh khubor mynta ka sngi, u la ong ba naduh ba ka sorkar ka la ai jingtrei ha uwei u kontraktor ba un pynbha bad siang rong ïa katei ka surok, ki paitbah ka thaiñ ki la kmen shikatdei. Hynrei, kaba pynlyngngoh ka long ba ka jingai jingtrei jong ka sorkar ïa utei u kontraktor, ka la long pynban kum kaba shu ai da ka jingbym banse namar ba ym don kontraktor satia hapoh ka jylla.
Kiwei pat ki para dkhot jong ka synjuk ki la ong ba wat la ka sorkar ka la ai mang pisa ban pyntrei ïa katei ka surok ruh, ka long thik kumba ka shu ai namar ba ka I beiñ ïa ki paitbah ka thaiñ bad kam shym la kheiñ satia ba ki dei ki briew.
Halor ka jingpynsahteng jong u kontraktor ban pyntrei ïa katei ka surok, na ka liang ki riew rangbah ka thaiñ ki la ïathuh ruh ba ki la leit ban ïakynduh ïa u Executive Engineer jopng ka PWD bad ki la ai da ka jingthoh. Nangta ïa u SDO bad ki la leit ban ïakynduh ruh ïa u Deputy Commissioner ban ïakren halor katei ka surok, hynrei ka jingleit ïakynduh jong ki ïa kitei ki heh sorkar ka khlem seisoh.
Ha kajuh ka por ki la ïathuh ba dang ha kine ki sngi ki la leit ban ïakynduh ruh ïa u Officer SRRDA, PMGSY ha Shillong bad la ai ruh da ka jingthoh halor ka jingpynsahteng jong u kontraktor ïa katei ka jingtrei, khnang ba un bthah ïa u ba un pyndep noh ha shuwa ban kut ka por ba la buh da ka sorkar.
Nalor kata ki la kynthoh ruh ba imat ba u bah Prestone Tynsong Symbud Myntri Rangbah u ba bat ruh ïa ka tnad PWD, u don ka jingïadei bad utei u kontraktor lymda kumta un nym nud ban pynsateng ïa ka jingtrei haduh mynta. Ki la ong ba ka sorkar ka la dei ban da bishar bniah ïa ki kontraktor shuwa ba kan ai jingtrei, namar lada kan shu ai thurmur kat ia ki kontraktor kiba shu kwah ban ïoh jingtrei hynrei kim don pisa ban ai ïa ki nongbylla kam don jimgut satia.
Ki la ong ba lada u kontraktor um lah ban trei pyndep ïa katei ka surok hapoh u bnai Ïaïong, na ka liang ka synjuk bad ki paitbah kim banse ban mih madan ban pynlong da ka jingïakhih, lane ban leit sha ka Ïingbishar ban dawa ïa ka hok ba ki dei ban ïoh, kat kumba ka sorkar ka la dep mang pisa na ka bynta ban pynbha ïa ka surok na ka bynta ban pynsuk ïa ki paitbah.
