Bitar ki paidbah ba pynsahteng u kontraktor ïa ka surok shnong Phyllud
![](https://mawphor.com/wp-content/uploads/2022/05/mawphor-1-2.jpg)
Nongstoiñ, Naitung 11: Ka jingbym shimkhia jong u kontraktor ban pyndep ha kaba pynbha bad siang rong ïa ka surok na Marngor sha Phyllud, kaba jngai kumba saw kilomitar tam, ka la pynlong ïa ki paitbah ba kin thnum bad bynñiaw haduh katta katta.
Halor ka jingud jingjong ka shnong Phyllud bad kiwei kiwei ki shnong kiba don ha katei ka thaiñ, ki nongïalam ka Hynñiewtrep Integrated Territorial Organisation, ki la leit ban jurip ïa katei ka surok bad ïakynduh ruh ïa ki paitbah katei ka thaiñ, ha kaba ki la lap ba ka jingpyntrei jong u kontraktor ïa katei ka surok, ka la long kaba torti haduh katta katta bad ïa ki mawria ba la dep siang ruh imat la khlong lut.
U bah S.P.Mawlieh nongïalam ka HITO West Khasi hills haba pyntip ha u nongthoh khubor, u la ong ba katkum ka jingpynsgew jong ki paitbah, la ong ba u kontraktor u la sdang ban pyntrei ïa katei ka surok naduh san snem mynshuwa. La mang pisa ban pyntrei da ka sorkar pdeng lyngba ka skhim Pradhan Matri Gramsdadak Yojana. Ka por ba ka sorkar ka la buh ba u kontraktor u dei ban peit bad maramot lada katei ka surok ka sniew ka la jan kut hynrei tang ban pyntrei ruh um pat dep satia.
U bah Mawlieh u la ong ruh ba katei ka jingpynsahteng jong u kontraktor ïa katei ka surok ka long kumba u leh beiñ ïa ki paitbah nongshong shnong bad ba um suidñiew ïa ki kyndon ba ka sorkar ka la buh ha ka por ba plie ïa ki tender.
U la ong ruh ba na ka liang ka seng kan sa leit ban ïakynduh ïa u Excecutive Engineer jong ka tnad PWD u ba dei peit ïa ki surok PMGSY, ban kyntu ïa u ba un bthah ïa u kontraktor ba u dei ban pyndep noh wut wut ïa katei ka surok, khnang ba ki paitbah katei ka thaiñ kin lait na ki jingeh.