Shillong, Jymmang 27: Khyndiat kynta hadien ba la saphriang ka video ba la rung da ki trai dukan ia ki arngut ki khynnah ba kiba la tuh jingbam na kawei ka dukan ha Shillong, ki paidbah jong ka nongbah Shillong, ki la kiew bitar lep halor ka jingleh kine ki trai dukan ban ring video por ba kylli jingkylli ia kine ki khynnah arngut.
Ki paidbah ki la pynpaw lyngba ki Social Media ba ki bor ba dei peit ia ki khynnah kum ka Child Protection Commission, ka Child Line bad kumjuh ruh ki Pulit ba kim dei ban aili ia kine ki trai dukan lane ia kino kino kiba pynsaphriang ia ka video jong kine ki khynnah.
“Nga lyngngoh ba ha kum kane ka juk shai dang don ki briew kiba leh dum, bad ki bym tip ba ka don ka ain kaba pyrkhing kumno ban iada ia ki khynnah”, la ong iwei i longkmie lyngba ka Social Media.
Ym shym la ioh jingtip la ki kynhun ba dei peit ban iada ia ki khynnah ki la iohi ne lap ne em ia kane ka video, kaba la buh ia ka jylla Meghalaya ha ka jinglehrain hakhmat ka ri India.
