Bitar ka UDP ïa u Minister, dawa ïa ka BJP bad CM ban pynshitom ïa u

Shillong, Naitung 07: Ka Seng UDP ka la pynpaw ka jingbitar ïa ka jingleh ibeiñ u Bah Sanbor Shullai, MMLA ka Seng BJP bad Myntri ka sorkar jylla bad ka la dawa ba dei ban pynshitom ïa u.
Ha ka jingïalang kaba kyrkieh kaba la pynlong mynta ka sngi ha kaba la ïadonlang ki MLA, ki MDC bad ki heh jong ka Seng, ka Party ka la rai ban dawa na ka Seng BJP bad kumjuh ruh na u nongïalam ka MDA, u Conrad Sangma ba dei ban pynshitom ïa u Bah Shullai.
Ha kajuh ka por ka Seng ka la pynrem jur ruh ïa u Bah Sanbor kaba ka ong kadei ka jingleh khlem akor bad ka jingleh ibeiñ ïa u nongïalam ka UDP hakhmat ka kyrtong President jong ka ri India, ka Draupadi Murmu ha ka jingïalang kaba la long ha Orchid Hotel ha Umïam.
“Kane ka jingleh u Bah Sanbor kadei kaba ngim lah ban pdiang bad kadei ka jingthad burom kum u nongmihkhmat bad ka jingleh ibeiñ ïa u nongïalam jong ngi”, la ong u Dr. Jemino Mawthoh, General Secretary ka Seng haba ïakren bad ki nongthoh khubor hadien ba la wai ka jingïalang.
Haba batai khambha halor kane ka jingleh u Bah Sanbor, u Dr. Jemino Mawthoh, u la ïathuh ba hynnin ka sngi ha ka jingïalang ba ka khot hi da ka BJP ban ïakynduh ïa Murmu bad ban pan jingkyrshan ïa ka elekshon President jong ka ri India, katba u Bah Metbah u dang ai jingkren bad batai ïa ki jingdonkam ka jylla kum ka jingpyntreikam ïa ka ILP, ka jingpynrung ïa ka ktien Khasi ha ka Khyrnit ba phra, ka jingshah thombor ki riewlum, ki Khristan, u Bah Sanbor u la pynthut ha shiteng ka jingkren jong u Bah Metbah da kaba wohdong ïa ka jingkren jong u.
“Kane ka jingleh ka pynlehraiñ ïa ki nongmihkhmat ka jylla bad kadei kaba une u MLA un ngat ha ka jingpynshitom”, la ong u Dr. Jemino.
Haba la kylli kiei ki jingpynshitom ba ka UDP ka kwah, na ka liang u Dr. Jemino u la ong ba ka shong ha ka BJP bad u nongïalam ka MDA, namar ka UDP ka leit sha kane ka jingïalang ruh dei bala khot da ka BJP. “Haba phi khot sngewbha ïa ngi kumno phin leh ibeiñ kylla ïangi”, la ong u nongïalam ka UDP.